Suav thiab Nyab Laj rov qhib kev tsheb nqaj hlau dua, cov hauj lwm kev tsheb nqaj hlau tshiab raug li ntawm 8 plhom 300 txhiab US dos las

Tom qab ncua tseg li ntawm 5 xyoos, kev khiav tsheb nqaj hlau ntawm Hanoi mus rau Nanning rov qab qhib dua. 2 lub teb chaws npaj siab txhim ib txoj kev tsheb nqaj hlau khiav ceev tshiab mus rau lub tshav nkoj Hais Foos. Yog ib feem hauv kev txhawb nqa kev ncig tsham teb chaws thiab kev lag luam hauv xeev ntuj. 

Kev khiav tsheb nqaj hlau ntawm Hanoi mus rau Nanning uas yog lub nroog kav tus kheej hauv lub xeev Guangxi Zhuang nyob Suav teb, tau ncua tseg tsis khiav tsheb txij xyoo 2020 los lawm, vim muaj tus kab mob COVID-19.

Kev rov qab qhib txoj kev tsheb nqaj hlau yog kev txhawb nqa tseem ceeb, vim cov neeg Suav yuav tau zoo kev mus ncig tsham Nyab Laj teb. Yog vim qhov no, 2 lub teb chaws cov tseem hwv thiaj xav txhim kho kom lub tshav tsheb nqaj rais ua qhov chaw tshiab uas tos txais tau neeg coob thiab ua raws ntiaj teb tus qauv. Tab sis kev sib koom tes ntawm Hanoi thiab Pej Ceeb tsis yog tas li ntawd xwb, cov tseem hwv Nyab Laj tseem tshaj txog qhov yuav ua dua ib txoj kev tsheb nqaj hlau khiav ceev tshiab, uas yog siv peev nyiaj txiag li ntawm 8 plhom 300 txhiab US dos las. Kom txoj kev tsheb nqaj hlau ntawd khiav tau mus txog lub xeev Lau Cai, Hanoi thiab lub tshav nkoj Hais Foos huv tib si.