Yves Bertrais: "Ib Txwm Nyob Ze Hmoob". Zoo Tswv Zov Yaj 25th Anniversary Episode 3
Kev sau ntawv Hmoob tshwm sim tau li cas ?
Qhov yooj yim ntawm tus ntawv Hmoob RPA, nws tshwm sim los yam txaus ceeb kawg. Txiv Plig Nyiaj Pov tau ua lub neej nyob hauv lub zos Roob Nyuj Qus, thiab nws pib kawm lus hmoob vim yog thawj kauj ruam ntawm kev tshaj lub Moo Zoo.
Nws tsis tau muaj tsev nyob, nws nyob hauv Yaj Txawj Tswb uas yog tus txiv neeb tsev xwb. Nws xyaum lus hmoob thiab siv ntawv Fab Kis los sau li tej lo lus hmoob. Thaum ntawd Hmoob tseem tsis tau muaj tus txwm ntawv los sau ua lus hmoob. Txiv Plig Nyiaj Pov nkag siab tias yuav ua li cas thiaj muaj qauv muaj quag thiab vam meej. Nws thiaj txiav txim siab meej tseeb rau tus kheej hais txog kev sau cov suab kom haum rau lo lus ntawd. Nws thiaj siv tus txwm ntawv Latin ib yam li siv ntawv Fab Kis, tab sis yuav txhab tej tug niam ntawv kom haum rau lub suab, ces txhua yam thiaj mus li ntawd. Zam Nob uas yog Txawj Tswb tus tub thiab Txiv Plig nkawd sib tham ib hmos. Txiv Plig hais tias Zam Nob piav txog lub ntsiab ntawm tej lo lus kuv tsis paub thiab tsis tau hnov dua rau kuv mloog, nws yog tus neeg kheev hais lus kawg thiab nws nyiam sib tham. Ntawm kuv, mas qhov nws muaj yog yam paj tshab Tswv Ntuj pub rau nws. Txiv Plig Nyiaj Pov thiaj tshais chaw mus nyob hauv Zam Nob tsev thiab kawm lus hmoob ntawm nws 2 xyoos. Thaum ntawd Txiv Plig to taub txog qhov tias yuav ua li cas lawm. Qhov kawg ntawm tus niam ntawv Latin nws yog sau ncaj qha thiab tsis nyuab rau tus nyeem. Vim lub peev xwm me me ntawm nws, nws tuaj yeem nthuav tawm cov suab ntawm ntau xeem lus sab hnub tuaj hais tau lus zoo heev. Tib lub caij ntawd nyob Louang Phabang thiab nyob Xiengkhouang kuj muaj lwm tus tub tshaj Ntuj Lus tau nrog Hmoob nyob thiab kawm lus hmoob. Lawv pib qhia kev ntseeg thiab qee leej kuj nyias tsim nyias tus ntawv kom tau kev qhia yooj yim. Txiv Plig Nyiaj Pov tau ntsib ib tug Txiv Plig As Mes Lis Kas hu ua Wolf, nws tab tom qhia kev ntseeg rau ib pab Hmoob kom tau mus qhia kev ntseeg nyob toj siab. Wolf qhia kev ntseeg ua lus Los Tsuas. Txiv Plig Nyiaj Pov tau tshaj tawm lub tswv yim uas nws xav tseg nyob hauv lub 2 hlis xyoo 1952. Thaum nws ntsib ib tug xib hwb Plos Tes Taas nyob ntawm txoj kev hauv nroog Louang Phabang, nws hais tias : “Peb cov tub tshaj Ntuj Lus Kav Tos Liv qhia Tswv Ntuj lub Moo Zoo rau cov Meo txawv koj. Yog tias peb ua li no ntxiv mus, mas peb yuav muaj 2 hom ntawv thiab qhov no yuav ua kom peb sib tawg. Vim li cas peb tsis los sib koom siv ib tug ntawv kom zoo ib yam ? Yog peb ua li no, mas peb yuav qhia tau lawv zoo dua.”
Txiv Plig Wolf pom txog txhua yam teeb meem yuav tshwm sim nyob hauv Hmoob, thiab tsis tau zais nws txoj kev kub siab lug rau cov lus Txiv Plig Nyiaj Pov hais. Ces nws thiaj caw tus Txiv Plig As Mes Lis Kas thiab lwm tus neeg tuaj sib koom cov hauj lwm no. Txiv Plig Nyiaj Pov zoo siab thiab nws hais tias : “Kom Wolf mus nrhiav tus kws txuj hu ua Smalley uas nws qhia ntawv nyob As Mes Lis Kas teb. Thiab nws kuj caw ib tug xib hwb CMA hu ua Burney uas nyuam qhuav tuaj txog Xiengkhouang, kom nws tuaj rau Loang Phabang. Txiv Plig kuj coj 2 tug tub hluas Hmoob mus koom thiab, yog Yaj Yeeb thiab Thoj Hwj uas nkawd hais tau lus Hmoob zoo kawg. Kom tus kws txuj Smalley mloog nkawd hais lus thiab sau lub suab kom meej.
Peb ua hauj lwm rau Wolf uas nws tsis muaj feem cuam txog kev sau ntawv, tab sis nws muab nws lub tsev rau peb ib lub lis piam los tsim tus ntawv hmoob.
Peb yuav tsum muaj tej txoj cai thiab xub xav ua ntej, xws li cov txwm ntawv puas tuaj yeem siv tshuab ntaus ntawv hauv kiab khw tau. Los yog tej tus txwm ntawv kav lub suab kom haum. Tus kws txuj Smalley tis npe rau cov ntawv no tias “Ntawv RPA”, yog los ntawm Popular Roman Alphabet. Yog tus ntawv Roman uas neeg nyiam siv thiab nws muaj txiaj ntsim qab hau rau ntawv hmoob txij lub hauv paus los.
Qhov tseeb tiag cov neeg Kav Tos Liv ntawm Montagne des Gaurs pib kawm lus Hmoob vim lawv nyiam. Txhua hmo muaj cov me nyuam tub thiab me nyuam ntxhais li ntawm 10 tawm leej tuaj sib sau ua ke kawm nyob ncig ib lub teeb hauv kuv tsev. Yog tom qab lawv mus ua teb rov los, thiab lawv maj mam kawm thiab xyaum nyeem uas yog thawj zaug.
Yam Txiv Plig Nyiaj Pov ua tiav ntawm ib tug tub tshaj Ntuj Lus.
Xyoo 1951, Txiv Plig Nyiaj Pov tau nyob hauv zos Hmoob los tau ib xyoos lawm. Nws kawm lus hmoob thiab maj mam nkag siab txog lawv tej kab lis kev cai. Tam sim no nws rais ua tus kws kho mob nyob hauv lub zos. Muaj coob leej neeg tuaj ntsib nws thiab kom nws pab kho mob. Tsis tas li ntawd, nws kuj muaj tshuaj noj uas nws nqa hauv nroog los thiab. Tab sis Txiv Plig Nyiaj Pov kuj ua xyem xyav tias nws puas tsim nyog yuav ua ntau dua qhov nws yuav tshaj lub Moo Zoo ? Nws paub tias yog tsis muaj kev tshaj lub Moo Zoo meej tseeb, mas yuav tsis muaj kev hloov siab tshiab. nub Pentencost xyoo 1951, nws tau hu tas cov txiv tsev tuaj thiab hais meej meej txog qhov tias : “Vim li cas nws thiaj tuaj nrog lawv nyob. Nws tshaj tias Yes Xus yog tus cawm lub ntiaj teb neeg thiab cawm lawv. Ces lawv yuav tu siab, yog tias nws rov qab mus tsev, vim tsis muaj ib yim neeg yuav tso lawv txoj kev hawm tseg kom tau raws Yes Xus. Ntawd yog lo lus tshaj Kerigma thawj zaug ntawm Txiv Plig.” Nws kuj hais lo lus ntawd ntau xyoo ntxiv thiab.
Txiv Plig Nyiaj Pov qhia cov me nyuam, kom lawv xyaum nyeem thiab pab saib cov neeg mob qee zaus uas nws tawm rooj ntau hnub los sis mus tsham cov zos Hmoob nyob tsis deb pes tsawg ntawm lub zos nws nyob. Hais yooj yim tias nws lub neej yog kev saj lub neej ntawm haiv neeg toj siab. Nws tawm tuaj uas kom muaj qhov ntxim siab. Qee zaus muaj qee leej neeg yuav xav tias nws lub neej txawv txav vim nyob ib leeg thiab muab tus kheej cev rau Tswv Ntuj. Nws maj mam qhia tias tus Tswv Ntuj no yog leej twg es thiaj muaj zog rub nws tag npaum no. Tab sis tsis muaj qhov hais txog kev hloov siab los txais kev ntseeg. Tsis kav Txiv Plig kuj nyob ruaj nreb thiab tsis mus qhov twg, tsis xav tias lwm lub zos yuav nyiam kev tshaj lub Moo Zoo dua qhov chaw nws nyob. Zam Nob cov lus yog zeem tseeb txog Txiv Plig. Lub npe Nyiaj Pov yog lub npe Hmoob ntawm Txiv Plig. Zam Nob hais tias : “Koj tuaj nrog peb nyob 3 xyoos lawm, peb yog phooj ywg. Kuv paub tias qhov koj tuaj nrog peb nyob, vim koj xav tias ib hnub twg peb yuav nrog koj teev hawm Yes Xus. Koj txoj kev teev hawm zoo rau koj, zoo rau cov neeg Fab Kis. Tab sis peb yog Hmoob, peb muaj kab lis kev cai uas poj ua tseg yawm ua cia, peb yuav tsis tso nws pov tseg. Kuv paub tias lo lus no yuav ua rau koj mob siab, vim koj nyob ib leeg teev hawm Yes Xus. Koj nrog peb nyob ntxiv mus tau, tsuav yog koj xav nyob. Tab sis yog koj xav mus lwm qhov los tau, kom koj tau ua koj cov hauj lwm tiav thiab tsuav yog qhov chaw koj sov siab dua nrog peb nyob.”
Tab txawm tej lo lus ntawd ua rau Txiv Plig Nyiaj Pov me siab, tsis kav nws kuj txiav txim siab nyob ntxiv mus. Vim nws ntseeg tias qhov Tswv Ntuj xa nws mus nyob hauv lawv lub zos, nws yeej muaj hom phiaj. Tom qab ntawd tsis ntev, yam uas xav tsis txog tau tshwm sim. Zam Nob mob hnyav thiab ntseeg tias qhov ciaj yog tsawg heev. Lawv thov kom Txiv Plig Nyiaj Pov mus saib seb puas muaj kev pab tau nws. Ntau xyoo ua ntej, Txiv Plig Nyiaj Pov kuj mob ib yam li Zam Nob thiab tej zaum kuj paub me me tias yog dab tsi. Txiv Plig cov tshuaj kuj pab cawm tau Zam Nob. Qhov no yog qhov txiav txim, vim Zam Nob pom Txiv Plig tus Tswv Ntuj lub ntsej muag tab tom kho Zam Nob. Tom qab ntawd, Zam Nob thiaj xav paub txog Tswv Ntuj thiab nws thov kawm kev ntseeg. Muaj Zam Nob, Zam Nob txiv thiab 3 tug me nyuam nrog Txiv Plig Nyiaj Pov nyob. Hnub tim 15 lub 8 hli xyoo 1954, uas yog hnub hwm Niam Mab Liab mus saum ntuj. Zam Nob, Zam Nob txiv thiab nws 3 tug tub thiaj txais lub Cim Ntxuav. Ua rau cov neeg hauv zej zog tsis txaus siab, tab sis lawv twb txais lub Cim Ntxuav tas lawm. Txij ntawd los thiaj muaj tug puav Hmoob nyob hauv lawv lub zos pib kawm kev ntseeg. Tej lub zos nyob tsis deb pes tsawg kuj thov kom Txiv Plig mus saib lawv, vim lawv xav paub txog Tswv Ntuj. Txiv Plig txoj kev ua tiag nyiaj thiab nws txoj kev ntseeg txi txiv ntau kawg. Nws muaj lub zog txhawb siab zuj zus nyob hauv kev sau ntawv qhia kev ntseeg, txhais Ntawv Ntshiab thiab sau tej lo lus yooj yim uas yuav pab kom cov Hmoob paub txog Yes Xus zoo tuaj. Txiv Plig Nyiaj Pov qhib ib lub tsev qhia kev ntseeg rau cov Hmoob. Tus uas kawm Tswv Ntuj lub Moo Zoo, cov kab ke thiaj qhia ua lus Hmoob tau. Cov Txiv Plig uas yog neeg hauv nroog thiaj tau txais kev tos txais zoo dua cov Txiv Plig txawv teb chaws. Thiab lawv qhia Yes Xus lub Moo Zoo tau zoo dua.
Xaus txhua yam kev paub nyob Los Tsuas teb.
Hauv lub Caij Hla xyoo 1960, muaj 120 tug Hmoob txais lub Cim Ntxuav thiab Hnub Chiv lub lis piam tom qab kuj muaj 3 tug me nyuam txais lub Cim Ntxuav. Tab sis lub caij ntawd tsov rog tab tom tuaj raug cov Hmoob nyob Xam Neua. Tseem hwv Nyab Laj xa 5,000 tus tub rog mus pov hwm lub nroog thiab nyob hauv nrog Xam Neua, hauv tshav dav hlau thiab tej caj qaum roob. Lub 8 hli ntuj, hnov thawj thawj lub suab phom loj nrov. Ib txhia tua lub nroog thiab tseem hwv cov tub rog tso tes khiav tas, hle lawv tus nom pov tseg.
Thawj 3 tug Txiv Plig tso lawv cov hauj lwm tseg, tab sis tseem tshuav lwm tus Txiv Plig nyob. Thiab lawv txoj hmoo raug ntaus cim kaw tseg tib yam nkaus. Tab txawm cov tub rog Nyab Laj tuaj kav tau nroog Xam Neua, tsis kav zoo li lawv xav hiam cov qhia kev ntseeg. Kev kub ntxhov heev zuj zus, tej xov xwm cuav hais txog qhov yuav ntes lawv kuj nrov ncha heev zuj zus thiab. Txog qhov kawg Txiv Plig Nyiaj Pov thiaj txiav txim siab nrog cov Hmoob khiav tawm hauv lub nroog mus. Cov tub tshaj Ntuj Lus kheev kheev pom tias lawv poob nyob hauv txoj kev ntshai, vim lawv ntsib cov tub rog Nyab Laj. Qee zaus zoo li lawv nyob hauv tshav rog. Qee zaus lawv tau txais kev pab ntawm cov Hmoob nyob hauv cov zos uas lawv khiav nkaum.
Tom qab 24 hnub ntawm kev tawm tsam, ces sawv daws ntseeg tias cov tub tshaj Ntuj Lus uas yog neeg txawv teb chaws nyob Xam Neua raug tua tuag lawm. Tab sis qhov kawg Txiv Plig Nyiaj Pov thiab 3 tug neeg qhia kev ntseeg khiav los txog Louang Phabang. Yog lub sij hawm kub ntxhov thiab tsis zoo kiag rau Txiv Plig Nyiaj Pov txoj kev tshaj Ntuj Lus thiab ua nws cov hauj lwm puas tsuaj tas nyob hauv cov suab phom loj. Nws poob tas txhua yam uas nws tau muab siab rau los txog tav no. Nws tsis tuaj yeem yuav rov mus hauv cov zos Hmoob uas raug cov tub rog Nyab Laj kav. Txiv Plig Nyiaj Pov rov los ua hauj lwm thiab npaj phau ntawv txhais lus Hmoob uas nws ua tiv nyob hauv lub 12 hlis xyoo 1961.
Nyob hauv lub caij ntsib kev txom nyem no, kev xav muaj tej lub tsev qhia kev ntseeg kuj pom tseeb zuj zus. Muaj tus qauv kom tseeb thiab kev kawm zoo txaus, vim xav kom cov xib hwb tuaj yeem ua tus coj cov neeg ntseeg tsis tas yuav muaj Txiv Plig qhia kev ntseeg, coj cov neeg ntseeg teev Ntuj thiab kho cov neeg ntseeg tej ntaub ntawv kom tshiab tas mus li.
Hauv cov xyoo 1962 txog 1975, uas yog xyoo cov tub tshaj Ntuj Lus raug ntiab tawm Los Tsuas teb. Lub tsev kawm ua xib hwb nyob Vees Cas tau xyaum cov tub ntxhais hluas li ntawm 50 tawm leej. Tab sis Txiv Plig Nyiaj Pov lub hom phiaj nthuav dav dua ntawd, nws muaj cov tub hluas Hmoob uas tab tom kawm kev ua liaj ua teb nyob Fab Kis teb. Tom qab ntawd tsis pes tsawg xyoo, lawv rais ua ib co neeg txawj ua liaj ua teb ntawm haiv Hmoob. Yog cov Hmoob uas tseem hwv Fab Kis xa mus nyob Nkws Yas.
Kev tsim ntawv qhia kev ntseeg, ntawv ua kab ke teev Ntuj thiab lwm hom ntawv muaj ntau heev. Txiv Plig Vaj Xwm (Bouchard) ua tus saib xyuas kev faib tej ntaub ntawv nyob Los Tsuas qaum teb, lub caij tsov rog tab tom kub ntxhov. Vim nws tib leeg xwb thiaj tau txais lus tso cai kheev mus saib tej zej zog.
Tab txawm tias kev kub ntxhov hauv kev tseev tsim maj mam ntaug, thiab tsov rog tab tom kis mus rau yav qab teb. Tsis kav xyoo 1962 txog 1975 kuj yog cov xyoo uas kev ntseeg tab tom vam meej nyob hauv cov Hmoob.
Xyoo 1964, Txiv Plig Txhiaj Foom (Daniel Taillez) kuj mus koom kev tshaj Ntuj Lus rau cov Hmoob thiab nrog cov Hmoob nyob mus txog xyoo 2019. Nws yog ib tug nyob hauv pab OMI kawg uas khiav tawm hauv Los Tsuas teb.
