Nyob rau hauv lub Koom Txoos Kav Tos Liv, puas muaj tej yam muaj nqis uas tsim nyog cov Plos Tes Taas yuav tau qhuas txog? Muaj 5 yam xws li nram no :
1. Ntau zaj lus tseem ceeb uas txij ntawm lub hauv paus los Tswv Ntuj tau tshaj rau peb tsoom ntseeg Kav Tos Liv ntseeg khov kho, mas peb kuj saib qhov ntawd loj.
Peb tsis hais tias : Kuv qhib phau ntawv Ntshiab tsuas yog yuav mloog saib Tswv Ntuj thiab Leej Ntuj Plig yuav qhia dab tsi rau kuv xwb. Yuav tsis xav txog lwm yam li.
Peb hais kam lus li no : Lub Koom Txoos yog kuv tus Xib Hwb thiab yog Peb Niam uas muaj cai yug peb los hauv lub neej ua neeg ntseeg. Peb thiaj ntseeg qhov uas lub Koom Txoos qhia rau nws cov me nyuam.
Muab piv rau lub log, mas cov neeg tau tsim lub log los rau tej tsheb twb tau 3,000 tawm xyoo lawm. Tsis tas yuav rov tsim dua ntxiv lawm. Txhais tias : Txoj hau kev ntseeg Ntuj mus raws qhov tseem ceeb, piv tau tias yog zoo li lub log uas twb tau muaj tuaj tau 1960 tawm xyoo los lawm no ces kawg yuav tau txais kev ntseeg ntawd ntawm lub Koom Txoos los.
Tau muaj 21 lub Rooj Ncauj Lus tseem ceeb; tau muaj tej tus Leej Ntshiab uas tau tshaj lus meej pem hais txog Ntuj Lo Lus thiab tau pab ntuas cov ntseeg Kav Tos Liv zoo kawg nkaus; Vaj Qhia thiab tas tsoom 4,000 tus Txiv Tswv Qhia, lawv sib koom siab koom ntsws thiab sib pab ua cov ‘Tswv Zov Yaj’ saib tsoom ntseeg Kav Tos Liv nyob tas qhov txhia chaw.
Kav Tos Liv txhais tias : Cia rau tas teb chaws. Yog vim peb yog tsoom ntseeg Kav Tos Liv, mas peb yuav tsis txhob xaiv neeg. Huab Tais Ntuj hu peb kom peb saib luag tej ob cag zoo li peb cov kwv tij; cov muam; cov phauj huv tib si. Tsis tseg leej twg li.
Huab Tais Ntuj hu peb kom peb ua siab dav dav, ces thiaj ib siab nrog luag tej ob cag sib koom siab koom ntsws. Nyob hauv tsab ntawv Es Fes Xos zaj 2 qib 14 sau tias “Leej Pleev muab ob haiv neeg los ua ib haiv neeg xwb. Lub laj kab kem ob haiv neeg, Leej Pleev thiaj muab lub laj kab ntawd rhuav pov tseg.” Los yog li Hmoob niaj hnub hais tias “Txawm tias ntuj deb kev ncua ntev los, tsuas yog toj
roob hauv pes quas xwb. Cas tsis muaj tus dab tsi yuav los quas tau peb lub siab lub ntsws.”
2. Muaj tej yam rau peb pom, rau peb ua, rau peb hnia, rau peb siv, rau peb noj haus; kom xwv peb thiaj tau tuaj cuag Tswv Ntuj thiab peb yuav tau txais Ntuj cov txiaj ntsim cawm neeg.
Xya lub Cim peb nqa Tswv Ntuj cov txiaj ntsim cawm neeg : qhov loj tshaj plaws thiaj yog Thaj Txi Ntuj uas yog lub txiaj ntsim muaj nqis tshaj plaws nyob tas qhov txhia chaw nyob thoob ntiaj teb. Peb zoo zoo siab ua Ntuj tsaug, rau qhov tias Leej Tswv Yim Ntshiab tau pab txuag kev ntseeg txog Thaj Txi Ntuj thiab lub Cim Yug kom muaj txoj sia nyob rawv rov los txog tav no.
Tsis tas li ntawd, muaj ntau yam ntxiv xws li : Dej foom hmoov zoo, txoj saw Mab Liab, cov mlom pab nco txog tej tus Leej Ntshiab. Peb kuj txais tshauv lub caij Plaub Caug, peb siv cov Roj Ntshiab los mus txais Ntuj cov txiaj ntsim. Tej daig duab pab yus nco txog niam Mab Liab.
3. Tus twg ib siab tshaj lub Moo Zoo thiab pab cov neeg txom nyem los mus ua ib qho tshiab tshiab, mas nws ua tau ywj siab. Tab sis yus tseem nyob hauv lub Koom Txoos Kav Tos Liv li qub.
Tsis hais tias xav txog ib qho tshiab los rub tej pawg neeg nrog yus mus. Los yus nyiam tshaj tej lo lus tseem ceeb uas los txog tav no tsis tau muaj leej twg tau xav tswv yim txog ib zaug li, yus thiaj li yuav ncaim ntawm lub Koom Txoos Kav Tos Liv mus tsa dua lwm lub. Cov ntseeg Kav Tos Liv tsis nyiam ua qhov ntawd li.
4. Lub Koom Txoos Kav Tos Liv pab qhia ntawv, pab cov neeg txom nyem, pab kho cov neeg muaj mob muaj nkeeg.
5. Lub Koom Txoos Kav Tos Liv zoo siab khaws yam zoo tseg, tej lis kev cai; ua zoo pab kom cov neeg sib pab sib hlub. Tsis hais tias peb lawb neeg, peb tsuas lawb dab xwb.
Nyob ntiaj teb no ib haiv neeg txawv lawm ib yam. Yog li, peb yog Hmoob peb yuav tau ua raws li peb Hmoob ib txwm ua los, uas yog tej kev lis kev cai uas tsis muaj qhov ua dab nrog. Peb yog Hmoob, peb ntseeg Ntuj li luag tau tab sis peb yuav mus coj li luag tsis tau.
Peb lawb dab xwb tsis lawb neeg. Yog li ntawd peb cov kwv tij neej tsa muaj dab tsi ua, peb kuj mus pab lub dag lub zog tau thiab; tseg tsis txhob nrog lawv teev dab teev qhua xwb.
Ua li mas, yog tias koj tig los ua neeg ntseeg Ntuj hauv lub Koom Txoos Kav Tos Liv, mas koj thiaj yuav tsis nrauj ntau yam tseem ceeb hauv peb cov Hmoob.
