Tim 13 lub 12 hlis xyoo 2020 tas los no, cov kwv tij Hmoob hauv xeev Kim Tsawb ua ntees hawm huab tais Txiv Yawg, muaj cov kwv tij Hmoob tuaj koom txog li 1,000 leej.
Txiv Yawg yog haiv neeg Hmoob tus huab tais nyob hauv Suav keeb kwm. Raws ntawv faj lem sau tseg mas Txiv Yawg sawv ntaus rog nrog Yeeb Tim thiab Faj Tim, ces thaum kawg Txiv Yawg swb rau haiv neeg Suav tus vaj Faj Tim.
Cov Hmoob muab tswm ciab thiab xyab los hlawv teev hawm, muab cawv nplej cub los txi rau huab tais Txiv Yawg nyob hauv lub zos Um Yaj, nroog Taj Tshais, xeev Kim Tsawb.
Tsis tas li, cov txiv qeej kuj tuaj dhia qeej thiab seev cev ua kev lom zem rau sawv daws tau saib.
Tom qab ua kab ke teev hawm tas lawm, cov kwv tij Hmoob mam muab cov cawv nplej cub los sib faib rau sawv daws haus. Cov txwj laus yuav muab lus foom koob foom hmov rau cov xeeb ntxwv.
Xyoo 2008, tseem hwv Suav tau teeb Hmoob lub ntees hawm Txiv Yawg no ua ib yam kab ke tseem ceeb nyob hauv lub xeev Kim Tsawb.
