Zam yug los nyob hauv lub kuj cuab Xyis Pas Yas ntawm lub nroog As Vis Las, xyoo 1542. Nws tau ua Leej Choj nyob hauv lub Koom Haum Kas Mes. Nws tuag xyoo 1591.
Nws txiv yog ib tug thawj coj nyob hauv lub nroog. Thaum Zam hnub nyoog muaj 21 xyoos, nws txiav siab ua ib tug Txiv Twj Cuab nyob hauv lub Koom Haum Kas Mes.
Zam zoo siab nrog cov Txiv Twj Cuab ntawd koom siab. Tab sis nws xam pom tias yuav tsum hloov Txoj Cai kav cov tub Koom Haum kom nruj dua qub. Ces Zam pib sau Txoj Cai nruj ntawd tseg. Tsis ntev tom qab mas muaj tej tug Txiv Plig hauv lub Koom Haum nrog Zam koom coj Txoj Cai nruj ntawd. Zam yog ib tug neeg ntse. Nws tej lus nthuav Ntawv Ntshiab thiaj ri mus tas hauv teb chaws Xyis Pas Yas. Zam kuj sau tej zaj Paj Huam piav Ntuj Kev Cai lub ntsiab rau cov neeg ntseeg.
Tab sis tshuav tej tug Txiv Plig uas tsis kam coj Txoj Cai tshiab ntawd, vim lawv xav tias nruj dhau lawm ! Lawv muaj ntsis sib khib rau qhov tias Zam lub npe nto moo zuj zus. Li ntawd, muaj ib hmos ib tug Txiv Plig nyob hauv tib lub Koom Haum ntawd thiaj coj ib pab tub ceev xwm tuaj ntes Zam. Ces lawv coj nws mus kaw nyob hauv ib kem tsev ti ti. Lawv xav tias Zam raug txom nyem ib ntus, ces nws yuav tso nws zaj tswv yim pov tseg. Nws yuav rov nrog lawv koom siab li qub.
Lawv kaw nws nyob hauv ib kem tsev nqaim nqaim uas tsis muaj qhov rais, tsuas muaj ib lub qhov nyob ntawm phab ntsa txheej saud xwb. Lawv muab ob peb daim txiag los ua txaj rau Zam pw. Lawv pub mov pub dej me me rau nws noj haus yug siav xwb.
Thaum Zam raug tsim txom mas nws tsis ntxub cov Txiv Plig uas tsim txom nws li ntawd. Niaj hnub nws muab siab rau thov Ntuj tas zog, ces nws lub siab haj yam npuab Tswv Ntuj zoo dua qhov qub tuaj.
Muaj ib hnub lawv coj Zam mus noj mov hauv kem tsev uas sawv daws noj mov ua ke. Thaum lawv noj mov tas, lawv kom Zam hle nws lub tsho thiab lawv yuam nws kom txhos caug. Ces cov Txiv Twj Cuab ntawd xuas hlua los nplawm Zam ib tug zuj zus. Cov tub hluas uas nyuam qhuav tuaj nrog cov Txiv Twj Cuab nyob, lawv pom qhov ntawd mas lawv quaj. Lawv qhuas txog Zam kawg, uas nws ua tiag nyiaj ris kev txom nyem. Nws nyob twj ywm rau lawv nplawm, nws tsis hais ib lo lus cem leej twg li. Cov tub hluas ntawd hlub Zam thiab muaj tej tus hais tias : “Zam yog ib tug Leej ntshiab tiag!”
Lawv coj Zam mus kaw nyob hauv ib kem tsev ti ti kawg, lawv tsis pub ib lub teeb los ib tug tswm ciab rau nws nyob hauv kem tsev. Tab sis muaj ob hmos sib law uas cov neeg zov Zam pom nyob hauv nws kem tsev ci ntsa iab zoo cuag li nruab hnub ntag. Cov zov qhov rooj thiaj li mus hu ib tug Txiv Plig loj tuaj saib. Thaum tus Txiv Plig loj tuaj txog mas nws poob siab, nws nthe tias : “Ua cas muaj qhov pom kev zoo li ntawd nyob hauv Zam kem tsev, kuv twb xub txwv tsis pub kom muaj ib lub teeb ci rau nws no ned.”
Thaum tus Txiv Plig loj hais li ntawd tas, mas qhov pom kev cia li ploj ntais tam sid. Ces rov muaj qhov tsaus ntuj li qub.
Thaum txog hnub tim 14 lub 8 hli, mas Zam nco ntsoov tias : “Tag kis yog zoo hnub uas tsoom ntseeg yuav cav lus zoo txog tus Nkauj TsimTxiaj Mab Liab nce mus lawm saum ntuj.”
Nws thiaj thov kom lawv tso nws tawm ntawm nws kem tsev mus ua thaj txi Ntuj nyob sab nraud. Tab sis cov tub zov qhov rooj tsis kheev nws tawm. Ob peb teev tom qab ntawd tus Nkauj Tsim Txiaj Mab Liab yees tawm tuaj rau Zam pom xyeem kiag ntawm qhov muag thiab hais rau Zam tias : “Me tub ! Koj ua siab loj mog ! Tshuav tsis ntev koj yuav dim, koj yuav tau kev ua thaj txi Ntuj. Tswv Ntuj yuav nplij koj lub siab kom rov zoo hlo.”
Tau ob hnub tom qab lawv coj Zam mus rau hauv lwm kem tsev uas muaj ib lub qhov rais. Ces Zam npaj ib txoj hlua uas nws yuav siv los pab nws kom tau tawm sab nraud. Ces muaj ib hmos Zam thiaj nyiag kev khiav dim ntawm kem tsev uas luag kaw nws raws li niam Mab Liab xub hais ntag. Zam rov qab los nrog pab Txiv Twj Cuab uas lawv mloog Txoj Cai nruj koom siab li qub.
Lub caij uas Zam nyob ib leeg hauv kev tsev luag kaw nws, mas nws haj yam npuab Tswv Ntuj zoo dua qhov qub.
Zam xav tias ua cas qhov tsaus ntuj nyob ib ncig ntawm kuv yuav ntau tas npaud. Tab sis kuv yuav tsis xav li ntawd, vim tias nyob hauv Tswv Ntuj yeej tsis muaj qhov tsaus ntuj li. Txawm yog hmo ntuj tsis kav Tswv Ntuj yeej pom kev cuag li nruab hnub.
Zam tau hais tias : “Ntawm Tswv Ntuj mas hmo ntuj nws pom kev cuag li nruab hnub.”
Zam hais tias : “Nej yuav coj ib lub neej nyob tiaj tus mus li thiaj yog. Yog tias nej cia nej lub siab poob rau txoj kev ua txhaum, mas txhais tias nej nkim zog dag.”
Zam hais tias : “Thov kom nej nco ntsoov tias Tswv Ntuj tau tshoj tej tus Yaj Saub los qhia tej zaj tswv yim tseem ceeb rau cov His Xas Lais. Thiab nws tau muab nws Lo Lus zeem tseeb rau lub ntiaj teb neeg. Tswv Ntuj Lo Lus zeem tseeb mas yog Huab Tais Yes Xus ntag.”
Zam hais tias : “Txog lub caij uas peb yuav sawv ntsug nyob ntawm Huab Tais Tswv Ntuj xub ntiag, mas Tswv Ntuj yuav soj ntsuam saib thaum peb ua neej nyob ntiaj teb mas peb puas tau nyiam Tswv Ntuj tiag. Peb puas tau sib nyiam sib hlub tiag ?”
Zam tau hais tej lo lus zoo li tus Hauv Paus Xa Lus Paj Lug hais kam tias : “Nyob hauv peb lub neej mas qhov loj tshaj plaws yog txoj kev nyiam.” (KLN 13 : 13)
Tus sau : TP. Txhiaj Foom
