Yog As Kis yog As Nas tus txiv, nkawd 2 leeg yog niam tais yawm txiv ntawm Huab Tais Yes Xus. Nkawd yog caj ces xeem Yus Das.
Yos As Kis thiab As Nas nkawd tsiv ntawm Nkas Lis Lais teb los nyob hauv lub nroog Nas Xas Les. Nkawd tu siab heev, uas ib sim neej nkawd tsis muaj tub ki. Nkawd taij Tswv Ntuj kom Tswv Ntuj pub nkawd muaj ib tug me nyuam. Ces Yos As Kis tawm mus teev Ntuj nyob ib qho chaw ntsiag to 40 hnub, kom nkawd txoj kev cia siab tsheej xeeb. Tswv Ntuj tus Tshiab thiaj tawm los hais rau Yos As Kis tias : “Tswv Ntuj yuav pub raws li koj thov sai sai no.”
Ces As Nas xeeb tub, nws thiaj tis npe rau tus me nyuam hu ua : Mab Liab. Txhais tias : ‘Tus puv txiaj ntsim’.
Tom qab no Mab Liab thiaj tau ua Yes Xus niam. As Nas qhia kom Mab Liab ua neeg zoo thiab coj ncaj.
Nyob ntawm Yos As Kis thiab As Nas nkawd lub qub tsev hauv nroog Yes Lus Xas Les, mas tau txhim ib lub tsev teev Ntuj rau nkawd nyob hauv tiam 4. Nkawd 2 lub cev tuag kuj yog faus nyob ntawm lub tsev teev Ntuj.
