Npes Nas yug xyoo 1090 nyob hauv ib lub Tuam Tsev nyob tsis deb ntawm lub nroog Dis Zoov, nyob hauv xeev ntuj Npus Nkaus, nyob nruab nrab Fab Kis teb sab hnub tuaj. Npes Nas tsev neeg yog neeg txheej siab.
Thaum Npes Nas muaj 19 xyoos, nws kawm txuj tiav, Npes Nas thiaj txiav txim siab mus ua Txiv Twj Cuab nyob hauv lub nroog Xis Taus. Tab sis, ua ntej uas Npes Nas yuav mus, mas Npes Nas xub nrog nws 5 tug kwv tij tham. Nws mus xyuas nws ib tug txiv ntxawm thiab 24 tus tub hluas nyob hauv nws lub zos. Nws nrog lawv 30 leej sab laj. Npes Nas coj 30 tus tub hluas tuaj nrog nws ua Txiv Twj Cuab.
Thaum ntawd, tus tswj lub tsev Txiv Twj Cuab nyob Xis Taus yog tus Txiv Twj Cuab hu ua Has Las Dis. Has Las Dis kom tsoom Txiv Twj Cuab nrog nws nyob lawv mloog txoj cai ua Txiv Twj Cuab Leej Ntshiab Npes Nes Dis tau tsim 600 xyoo ua ntej.
Npes Nas nyob Xis Taus 3 xyoos. Nws coj txoj cai nruj tshaj hauv kev teev Ntuj, kev kawm txuj, thiab kev yuam nws lub cev.
Thaum Npes Nas muaj 25 xyoos, cov hlob xa Npes Nas mus qhib lub tsev Txiv Twj Cuab tshiab nyob Kes Les Vaus. Kes Les Vaus nrug deb ntawm Pas Lis 180 km. rau toob fab naj.
Lub tsev txiv twj cuab nyob Kes Les Vaus nto moo sai. Tos tsis ntev mas lawv tsim 160 lub tsev Txiv Twj Cuab nyob Fab Kis teb thiab Aws Los Pas teb.
Npes Nas nyiam nyob ua Txiv Twj Cuab teev Ntuj twj ywm nyob Kes Les Vaus. Tab sis Npes Nas nto moo, ces luag tsis cia nws nyob twj ywm. Cov Tswv Qhia, cov vaj kav cov kuj cuab, cov Vaj Qhia hu Npes Nas tuaj pab tu plaub ntug kom sib haum xeeb thiab nyob thaj yeeb.
Xyoo 1130, Vaj Qhia Hos Naus Lis Us Ob tau tas sim neej. Ces cov Tswv Qhia Liab thiaj sib sau los xaiv tus Vaj Qhia tshiab. Feem coob hauv cov Tswv Qhia Liab pov ntawv xaiv tsa Is Naus Xaas Ob ua Vaj Qhia tshiab saib tsoom ntseeg nyob thoob ntiaj teb. Tab sis muaj ib co Tswv Qhia Liab tsis pom zoo ces cov Tswv Qhia thiaj rov xaiv tsa lwm tus Vaj Qhia uas nws muaj lub npe hu ua As Nas Kes Tus Ob. Tsis ntev ces cov Tswv Qhia Liab thiaj fi xo mus rau Txiv Plig Npes Nas thov kom nws mus ntuas cov Tswv Qhia Liab saib lawv puas yuav hais sib haum.
Xyoo 1145, nyob Fab Kis qab teb muaj ib pab neeg pib ntseeg txog tej zaj txawv uas lub Koom Txoos xub khaws tseg ua ntej. Lawv tshaj tej zaj lus zoo li no tias Huab Tais Yes Xus tsis yog Tswv Ntuj Leej Tub. Nws tsuas yog Ntuj ib tug Tshiab uas Tswv Ntuj xa tuaj nyob ntiaj teb no xwb. Li ntawd mas txhob hais tias Yes Xus raug tsim txom saum Ntoo Cuam thiab nws sawv hauv cov tub tuag rov los. Lawv tseem hais tej lo lus cuav zoo li no tias thaum txog lub caij ntiaj teb kawg, mas cov neeg tuag lub cev yuav tsis sawv rov los. Tsis muaj dab phem lub teb chaws thiab tsis muaj lub teb chaws them txim. Lub Koom Txoos 7 lub Cim nqa Tswv Ntuj cov txiaj ntsim cawm neeg kuj tsis muaj qab hau. Thiab lub neej ua txij ua nkawm mas yog ib yam txhaum loj kawg nkaus.
Nyob Fab Kis qab teb mas muaj tej tus Tswv Qhia hnov txog Txiv Plig Npes Nas lub tswv yim thoob tsib, ces cov Tswv Qhia thov kom Txiv Plig Npes Nas mus nthuav tej lo lus tseem ceeb txog tej zaj tswv yim yuam kev uas peb nyuam qhuav hais rau nej mloog no. Ces Txiv Plig Npes Nas kuj mus xyuas cov ntseeg nyob Fab Kis qab teb thiab hais tej lo lus ntuas cov ntseeg. Nws qhia tej zaj tseeb uas ib txwm muaj nyob hauv lub Koom Txoos. Txiv Plig Npes Nas kub siab txhawb nqa kev ntseeg mus raws qhov tseeb. Ces cov ntseeg rov qab ntseeg khov kho li qub.
Tau ob peb xyoos tom qab, cov Mawv Xis Lim ntaus rog txeeb His Xas Lais teb. Ces Vaj Qhia thov kom Txiv Plig Npes Nas sau ib cov tub rog coj Ntoo Cuam mus tiv cov Mawv Xis Lim. Txiv Plig Npes Nas thiaj mus cuag tej tus vaj kav cov kuj cuab xws li Fab Kis teb, Zes Mas Nias teb, Aas Kiv teb, Xyis Pas Yas teb thiab Pos Kas teb. Qhov kawg thiaj muaj ib pab tub rog coob coob sawv kev ntawm Aws Los Pas teb mus ntaus rog tiv cov Mawv Xis Lim. Tab sis lub caij ntawd Txiv Plig Npes Nas muaj mob, ces nws tsis nrog pab tub rog mus tim teb chaws His Xas Lais. Ces cov tub rog coj Ntoo Cuam lawv ntaus rog tsis yeej.
Lub caij ntawd nyob Zes Mas Nias teb muaj ib pab tub tshaj Ntuj Lus hais tej lo lus tsis zoo txog cov His Xas Lais. Ces tsoom ntseeg ua tej yam phem los raug cov His Xas Lais, lawv txhob txwm tsis mus muas toob xib thiab txhiam xws noj nyob hauv cov tub luam His Xas Lais tej tsev. Thaum cov neeg ntseeg mus ntsib cov His Xas Lais, mas lawv hais lus thuam cov His Xas Lais tias “Saib! Ib cov tub sab tuaj txog ntawd!” Ces cov Tswv Qhia nyob Zes Mas Nias teb thiaj hu Txiv Plig Npes Nas mus tsham Zes Mas Nias teb, kom nws ntuas cov neeg ntseeg. Niaj hnub chiv Txiv Plig Npes Nas ntuas cov neeg ntseeg kom tsis txhob ua tej yam phem rau cov His Xas Lais. Txiv Plig Npes Nas hais tias “Peb yuav tsum hwm cov His Xas Lais, vim lawv yog peb niam peb txiv ntawm txoj kev ntseeg txog Huab Tais Tswv Ntuj. Peb yuav sib nyiam sib hlub thiaj yog.”
Yog vim Txiv Plig Npes Nas cov lus ntuas zoo li ntawd, mas qhov kawg Zes Mas Nias teb thiaj rov tiaj tus thiab sib haum xeeb.
Txiv Plig Npes Nas tau tas sim neej nyob hauv xyoo 1153. Thaum ntawd nws hnub nyoog muaj 63 xyoos. Yog vim Txiv Plig Npes Nas tej dej num tseem ceeb, mas nyob Fab Kis teb, Zes Mas Nias teb, Aas Kiv teb thiab Hos Laas teb thiaj muaj 350 lub tsev Txiv Twj Cuab uas lawv kub siab mloog txoj cai Txiv Plig Npes Nas tau sau tseg.
Leej Ntshiab Npes Nas hais ib co lus zoo li no tias “Niaj hnub, kuv tsa muag ntsia tus Ntoo Cuam ces kuv rov nco txog Huab Tais Yes Xus txoj kev raug txom nyem. Kuv ntseeg tias Yes Xus txoj kev nyiam kev hlub yog ib hom tshuaj kho kuv lub siab ntsws kom zoo. Yog vim qhov ntawd kuv thiaj ua siab loj siab tawv tag mus li. Kuv nrauj tej kev ntxhov siab pov tseg. Niaj hnub no Leej Pleev muaj peev xwm daws kuv tej txhaum pov tseg. Kuv thiaj li coj tau ib lub neej ruaj nreb khov kho. Kuv tsis ntshai tus dab phem tej lus haub lus ntxias. Kuv lub siab nyob tiaj tus, kuj yog vim kuv tus Huab Tais Yes Xus nres kuv. Huab Tais Yes Xus txoj kev nyiam kev hlub kho tau kuv lub siab lub ntsws kom zoo.”
Leej Ntshiab Npes Nas tseem hais tias “Nyob hauv ib lub teb chaws twg kuj xij, peb yuav tsis txhob muaj ib tug neeg hais tias kuv tej txhaum hnyav dhau. Huab Tais Tswv Ntuj ua tsis tau dab tsi los pab kuv.”
Leej Ntshiab Npes Nas tseem hais ntxiv tias “Niaj hnub kuv nco txog kuv cov txhaum, tab sis kuv tsis ntaus siab yau. Yog vim kuv paub tias Huab Tais txoj kev nyiam kev hlub nrog kuv nyob nraim, ces kuv thiaj tau kev dim ntawm kuv tej txhaum. Niaj hnub Huab Tais Yes Xus yog tus pub lub siab ncaj ncees thiab lub siab dawb huv rau kuv.”
Leej Ntshiab Npes Nas tseem hais tias “Peb tus Huab Tais siab ntshiab yog tus Tswv Ntuj muaj hwj chim loj tshaj thiab nws yog txoj kev nyiam kev hlub. Nws thiaj cia nws Leej Tub Yes Xus raug tsim txom kom tau cawm peb dim ntawm peb cov txhaum. Raws li cov Hauv Paus Xa Lus tej lus hais tias yam zeem tseeb txog Tswv Ntuj txoj kev nyiam peb, mas yog thaum peb tseem muaj txhaum Leej Pleev tuag kom tau pab daws peb cov txhaum.”
