‘Miv Kas’ txhais tias ‘tus twg yuav zoo li Tswv Ntuj’, yog li Miv Kas thiaj yog tus qauv hais txog kev tsis muab hlob nyob ntawm Tswv Ntuj xub ntiag. Miv Kas yog tus tsom kwm cov His Xas Lais thaum lawv tawm hauv Pes Xis teb rov los rau lawv lub teb chaws. Lub Koom Txoos saib Miv Kas yog tus ntaus tsam nrog tus thawj dab Lus Xis Fes. Miv Kas yog tus tuaj coj tib neeg tus ntsuj plig tawm hauv lub ntiaj teb no mus txais kev txiav txim, thiab Miv Kas yog tus pov hwm lub Koom Txoos.
‘Nkas Nplias’ txhais tias ‘Tswv Ntuj lub zog’, nws yog tus xa xov tuaj rau tib neeg xws li thaum tuaj qhia Das Nias hauv npau suav txog Tswv Ntuj Leej Yaj, thaum tawm tuaj hais rau Ntxas Kas Lias tias nws poj niam yuav yug ib tug tub, thaum coj Tswv Ntuj lub moo tuaj qhia rau Mab Liab tias nws tau txoj hmoov zoo, tus xeeb hauv Mab Liab lub cev yog Tus Nyob Siab Leej Tub, tuaj ua npau suav rau Yos Xes, thiab tawm tuaj qhia cov zov yaj kom paub tias tus Cawm Seej yug los lawm.
‘Las Fais’ txhais tias ‘Tswv Ntuj cawm’. Nws tawm tuaj ua Tos Npias luag mus yuav poj niam, thiab qhia Tos Npias kho nws txiv Tos Npis qhov muag kom rov pom kev.
