ZAJ NYEEM HNUB TIM 9 LUB 4 HLIS, HNUB PEB LUB LIS PIAM 2 CAIJ HLA
COV LUS NYOB HAUV ZAM NTAWV MOO ZOO (ZM 3: 7-15)
Kwv tij Hmoob sawv daws, Nis Kos Des Mos pom Huab Tais Yes Xus ua hwj huam thiab mloog Huab Tais Yes Xus cov lus, mas nws mem tau tias Huab Tais Yes Xus yog tus tuaj ntawm Tswv Ntuj tuaj. Muaj ib hmos, Nis Kos Des Mos thiaj tuaj nrog Huab Tais Yes Xus tham. Zam sau nyob hauv nws phau ntawv Moo Zoo tias nkawd sib tham txog kev yug dua tshiab; yog yug ntawm Leej Ntuj Plig los.
Kwv tij Hmoob, hais txog ‘Leej Ntuj Plig’ mas yog yam neeg to taub tsis yooj yim kiag li, vim yog yam neeg ntsia tsis pom. Huab Tais Yes Xus thiaj hais ua piv txwv tias “Zoo ib yam li cua, koj paub tias muaj cua tab sis koj ntsia tsis pom. Koj hnov cua tshuab tab sis koj tuav tsis tau.”
Huab Tais Yes Xus hais ntxiv tias nws yog tus tuaj saum ntuj tuaj, mas nws thiaj hais txog tej yam nws pom; tab sis vim neeg lub tswv yim mem tsis tau mas neeg thiaj ceeb laj txais tau cov lus Huab Tais Yes Xus hais no.
Kwv tij Hmoob, muaj li Huab Tais Yes Xus hais tiag, niaj hnub no peb ceeb laj ntseeg tau tej yam peb qhov muag tsis pom, peb kov tsis tau. Tos peb ceeb laj ntseeg vim peb tsis kam qhib tswv yim ntseeg tej ntawd.
Nyob hauv peb txoj kev ntseeg txog Huab Tais Yes Xus los yeej zoo li ntawd, yog peb tsis qhib siab mloog Huab Tais Yes Xus lo lus, yog peb qhib peb lub tswv yim txais tej yam peb tsis paub txog; mas peb yuav ua cas ntseeg tau.
Li ntawd, Huab Tais Yes Xus thiaj hais kom peb rov yug dua tshiab saum txheej siab los, yog yug ntawm Leej Ntuj Plig yam peb paub tias muaj tab sis ntsia tsis pom, mas peb thiaj yuav ntseeg tau Huab Tais Yes Xus.
Nyob zoo sawv daws.
