ZAJ NYEEM HNUB TIM 8 LUB 8 HLI 2025
HNUB NCO TXOG LEEJ NTSHIAB DOS MIS NIS
COV LUS NYOB HAUV MAS TAIS NTAWV MOO ZOO (MT 16: 24-28)
Kwv tij Hmoob sawv daws, cov thwj tim raws Huab Tais Yes Xus, lawv mloog nws cov lus qhia thiab ua raws li Huab Tais Yes Xus hais kom lawv ua. Nyob hauv Lis Piam 18 caij Nyob Nruab Xyoo, peb thiaj pom tias Huab Tais Yes Xus xav kom cov thwj tim hlub ib zeej tsoom, lawv tsis txhob ua neeg qia dub, ces Huab Tais Yes Xus hais kom lawv muab lawv cov mov pub rau cov neeg tshaib noj. Huab Tais Yes Xus xav qhia lawv kom tso siab thiab ntseeg ruaj thaum lawv raug xwv txheej, ces Huab Tais Yes Xus thiaj cia cov thwj tim caij nkoj hla dej ntuj, nws mus ko taw saum nplaim dej mus cuag lawv. Huab Tais Yes Xus coj cov thwj tim mus txog Tws Los thiab Xis Doos teb, muaj ib tug poj niam Kas Nas Has lub siab ntseeg, nws thov Huab Tais Yes Xus mus kho nws tus ntxhais, Huab Tais Yes Xus xav kom lawv ua zoo li tus poj niam no. Huab Tais Yes Xus tseem nug lawv saib lawv xav li cas txog nws, ces Pob Zeb hais tias Huab Tais Yes Xus yog Leej Pleev.
Hnub no, Huab Tais Yes Xus thiaj hais rau lawv meej meej tias lawv yuav ua dab tsi, yog tias lawv txiav siab raws nws tiag. Huab Tais Yes Xus hais tias “Yog nej leej twg xav los raws kuv, nws yuav tsum nrauj nws, nws yuav kwv nws tus ntoo cuam, nws yuav lawv kuv qab.”
‘Raws Huab Tais Yes Xus’ yog ‘ua Huab Tais Yes Xus thwj tim’, yog ‘ntseeg txog Huab Tais Yes Xus’. Li ntawd, Huab Tais Yes Xus lo lus no thiaj hais tau tias “Yog nej xav ua neeg ntseeg txog Yes Xus.”
Kwv tij, peb xav ua neeg ntseeg, peb yuav ua dab tsi?
Huab Tais Yes Xus hais li no “Nej yuav tsum nrauj nej, nej yuav kwv nej tus ntoo cuam, thiab nej raws kuv qab.”
Peb ‘nrauj’ peb li cas?
Yog kom peb txhob xav txog peb ntau dhau, peb yuav tsum xav txog Tswv Ntuj thiab xav txog lwm tus ua ntej. Muab hais los mas yog kom peb nyiam Tswv Ntuj thiab nyiam luag tej.
Peb ‘kwv’ peb tus ntoo cuam. Yog li peb tus ntoo cuam yog dab tsi?
Ntoo cuam yog lub cim qhia txog kev txom nyem kev tuag. Peb kwv peb tus ntoo cuam thiaj yog kom peb txaus siab ris peb kev txom nyem, zoo siab tuag xws li Huab Tais Yes Xus. Txoj kev txom nyem Huab Tais Yes Xus hais kom cov ntseeg txog nws ris, tsis yog txoj kev txom nyem tuaj ntawm kev tub nkeeg, tiam sis yog txoj kev txom nyem tuaj ntawm Tswv Ntuj tuaj kom tau pab luag lwm tus; xws li tus poj niam Kas Nas Has yeem raug Huab Tais Yes Xus hais cov lus piv nws li ib tug dev, nws ua tiag taij thov tsis tseg.
Peb ‘raws’ Huab Tais Yes Xus qab, mus raws Huab Tais Yes Xus tus lw; yog kom ua raws li Huab Tais Yes Xus cov lus qhia thiab ua piv txwv rau peb yoog. Tsis yog kom peb huas ua Huab Tais Yes Xus ntej, tsis yog kom peb mus raws lwm tus lub suab qhia.
Huab Tais Yes Xus hais ntxiv tias yog peb raws Huab Tais Yes Xus raws li hais, mas peb yuav tau txai txoj sia. Huab Tais Yes Xus hais li no “Leej twg plam nws txoj sia vim kuv, mas nws yuav rov tau nws txoj sia.”
Kwv tij, Huab Tais Yes Xus yog qhov tseeb, ces cov lus tawm ntawm Huab Tais Yes Xus lub ncauj los thiaj yog lus tseeb. Li ntawd, yog peb txiav siab nrauj peb, peb txiav siab kwv peb tus ntoo cuam, thiab peb txiav siab raws Huab Tais Yes Xus qab li hais, mas qhov kawg peb yuav tau Huab Tais Yes Xus txoj sia ua peb cuab tam. Yog peb lam raws Huab Tais Yes Xus; yam li ntseeg txog Huab Tais Yes Xus, tab sis peb tsis nyiam Tswv Ntuj thiab nyiam luag tej, peb tsis yeem ris kev txom nyem kom tau pab luag tej, peb tsis mloog Huab Tais Yes Xus lus, mas peb yuav tsis tau txoj sia ua cuab tam, peb kawg yuav plam txoj sia dawb dawb xwb.
Nyob zoo sawv daws.
