ZAJ NYEEM HNUB TIM 8 LUB 2 HLIS 2025
HNUB NCO TXOG LEEJ NTSHIAB ZES LAUS ES MIS LIS AS NIS
HN 13: 15-17, 20-21; MK 6: 30-34
Kwv tij Hmoob sawv daws, lub Moo Zoo hnub no yog cov xwm ua ntej Huab Tais Yes Xus yuav ua kom mov ntsu tuaj yug cov neeg raws nws, thiab cov xwm hnub no kuj yog tom qab Huab Tais Yes Xus xa pab Kaum Ob mus tshaj Lo Lus rov los.
Huab Tais Yes Xus pom cov thwj tim mus ua hauj lwm tshaj Lo Lus rov los, lawv sab mas Huab Tais Yes Xus hlub lawv. Huab Tais Yes Xus thiaj nrhiav tej qhov chaw xu kev kom cov thwj tim tau so.
Huab Tais Yes Xus kuj pom cov neeg coob coob tos mloog nws cov lus mas Huab Tais Yes Xus kuj hlub lawv, ces Huab Tais Yes Xus thiaj pub lo lus cawm siav rau lawv.
Niaj hnub, peb puas muaj lub siab hlub neeg xws li Huab Tais Yes Xus, peb puas hais rau cov neeg nrog peb ua hauj lwm ua ke tias “Nej nrhiav chaw so ib me ntsis kom los siav mas.” Peb puas hais rau cov neeg tuaj vam txog peb tias “Cia kuv pab nej mas.”
Kwv tij, peb sim ua tib zoo xav saib puas muaj neeg hais rau peb tias “Ua cas koj siab dub ua luaj”, “Ua cas koj yuav ua neeg siab txia ntshav tsis paub hlub luag tej li”, los yog hnov luag hais txog peb tias “Nws mas tsis txawj hlub lwm tus.” Los yog peb xav saib thaum peb pom neeg txom nyem, peb puas hlub lawv.
Peb yog cov neeg ntseeg txog Yes Xus, peb yog Huab Tais Yes Xus cov thwj tim mas tsis phim peb yuav tsis muaj siab hlub lwm tus. Li ntawd, yog peb muab ua tib zoo xav tas peb pom tias peb yog neeg siab txia ntshav, yog neeg siab dub, yog neeg siab pob zeb tsis txawj hlub lwm tus, mas peb yuav tau thov Huab Tais Yes Xus pab hloov peb lub siab lub ntsws kom ua ib lub siab muag siab mos mas peb thiaj yuav hlub tau cov neeg txom nyem.
Kwv tij Hmoob, tsis yog cov thwj tim sab xwb, Huab Tais Yes Xus los nws kuj sab thiab; tab sis thaum Huab Tais Yes Xus pom cov neeg coob tuaj tos mloog nws, mas nws hlub cov neeg ntawd, ces Huab Tais Yes Xus qhia lawv.
Ntawm peb cov neeg ntseeg mas peb puas zoo li ntawd, peb puas sab puas nkees ua txoj hauj lwm tshaj lub Moo Zoo rau cov neeg tos txoj kev cawm. Peb puas hais tias “Ab! Hnub no nkees nkees li, cia tag kis tso kuv mam mus xyuas pawg ntseeg.” “Hnub no kuv ua hauj lwm ib hnub lawm, cia lwm hnub kuv mam mus pab koj.” Peb puas hais zoo li ntawd?
Peb puas sab puas nkees mloog Tswv Ntuj Lo Lus. Peb puas hais tias “Txiv Plig hais dab tsi kuv twb tsis paub, ces kav liag tsis mloog os.” “Kuv twb tau hnov Lo Lus no tas lawm, mloog los zoo li qhov qub xwb.” Peb puas hais zoo li ntawd?
Kwv tij Hmoob sawv daws, phim peb yuav kub siab nrhiav kom tau mloog Tswv Ntuj Lo Lus xws li cov neeg coob coob tuaj tos mloog Huab Tais Yes Xus. peb txhob sab rau kev nrhiav Huab Tais Yes Xus vim Huab Tais Yes Xus yog Lo Lus pub txoj sia rau tus mloog thiab nrhiav. Huab Tais Yes Xus yog qhov chaw rau peb so los siav.
