ZAJ NYEEM HNUB TIM 7 LUB 9 HLI 2024
HNUB XYA LUB LIS PIAM 22 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 6: 1-5)
Cov kws tij Hmoob, hnub no lub Moo Zoo kuj rov hais txog ib yam Huab Tais Yes Xus thiab cov thwj tim tau ua nyob hauv cov Yus Das hnub caiv. Yog cov thwj tim de tej tes nplej los noj.
Kwv tij, hnub Xas Npas Tos mas cov Yus Das caiv tsis pub ua hauj lwm, lawv hais tias sawv daws yuav so, mas thaum cov thwj tim de tej tes nplej li ntawd thiaj yog lawv tab tom ua hauj lwm. Yog li cov Fas Lis Xais thiaj nug tias “Vim li cas nej ua tej yam uas hnub Xas Npas Tos yuav tsum caiv?”
Kwv tij, peb hnov Huab Tais Yes Xus teb rau lawv tias “Nej hais tias kuv cov thwj tim ua tej yam yuav tsum caiv hauv hnub xas npas tos, ua cas nej tsis nco tias thaum tus vaj Xas Ws caum Das Vis lawv, lawv khiav mus nkaum hauv Tswv Ntuj lub tsev, lawv tshaib plab ces lawv muab cov mov txi Ntuj los noj.”
Kwv tij Hmoob sawv daws, thaum Huab Tais Yes Xus hais txog tus vaj Das Vis ua tej yam zoo li ntawd, mas vim cov Yus Das hwm tus vaj Das Vis zoo, ces lawv thiaj tsis muaj cuab kav yuav hais dab tsi ntxiv.
Huab Tais Yes Xus tseem hais ntxiv rau lawv tias “Neeg Leej Tub yog Xas Npas Tos tus tswv.”
Kwv tij, Neeg Leej Tub yog Huab Tais Yes Xus, Huab Tais Yes Xus kuj yog Tswv Ntuj thiab. Thaum Huab Tais Ntuj pub Txoj Cai rau Mais Xes, mas Huab Tais Ntuj hais kom Mais Xes coj los qhia cov Yus Das muab ib hnub hauv lub lis piam los ua hnub tshwj tseg cia tau nco txog Tswv Ntuj lub txiaj ntsim, los ua hnub cav txog Tswv Ntuj, hnub ntawd mas lawv yuav tsis ua hauj lwm dab tsi li vim hnub ntawd yog Tswv Ntuj hnub.
Yog li mas Huab Tais Yes Xus thiaj yog hnub xas npas tos tus tswv, nws yuav cia neeg caiv los tsis caiv yog nyob ntawm nws.
Ib qhov tuaj, cov kwv tij, Huab Tais Ntuj txoj cai yog kom sawv daws hwm ntuj thiab txawj sib nyiam sib hlub. Tsim nyog thaum cov Fas Lis Xais pom Huab Tais Yes Xus cov thwj tim tshaib plab, lawv yuav tau pub mov rau Huab Tais Yes Xus cov thwj tim noj.
Kwv tij Hmoob sawv daws, peb yuav nco qhov no cia; Tswv Ntuj tsis xav kom peb muab neeg tej cai, tej kab ke los txwv tsis cia peb tau ua qhov zoo, ua tej hauj lwm xis Tswv Ntuj siab.
