ZAJ NYEEM HNUB TIM 7 LUB 2 HLIS 2025
HNUB RAU LUB LIS PIAM 4 CAIJ NYOB NRUAB XYOO
HN 13: 1-8; MK 6: 14-29
Kwv tij Hmoob zoo nyiam, Hes Los ntes Zam kaw hauv tsev loj faj, nws kuj tsis xav muab Zam tua tab sis vim Hes Los tau hais rau cov nom tswv tuaj koom nws lub ntees tsuj xeeb tias yog Hes Los Dias tus ntxhais thov dab tsi mas nws yuav muab rau. Thaum tus ntxhais thov Zam lub taub hau, yog Hes Los tsis muab rau tus ntxhais mas ntshai sawv daws yuav xyav tias Hes Los tsis ua raws li nws cov lus, ces nws yuav poob ntsej muag. Yog li Hes Los thiab kom neeg mus txiav Zam lub taub hau los rau tus ntxhais.
Zam tuag tas, Hes Los ho hnov sawv daws hais txog Yes Xus lub npe, ces Hes Los lub siab yoob tas, nws xav tias yog Zam sawv rov los.
Kwv tij, tos Hes Los ntes Zam kaw vim tias Zam pom Hes Los ua tsis ncaj ces Zam ntuas Hes Los. Hes Los qhov tsis ncaj yog nws mus txeeb tus tij laug Fis Lis Pos tus poj niam los ua nws sev.
Hes Los pom tias Zam hais yog, ces nws ntshai thiab hwm Zam. Hes Los saib Zam yog neeg siab ncaj thiab siab ntshiab tiag. Tab sis vim ntshai poob ntsej muag thiab ntshai poob hwj chim mas qhov kawg Hes Los thiaj muab ib tug neeg siab ncaj siab ntshiab tua.
Kwv tij Hmoob, tus poj niam Hes Los txeeb los ua nws poj nws sev yog Hes Los Dias.
Hes Los Dias hnov Zam cov lus tsawm nws thiab Hes Los ua tsis ncaj, mas nws ntxub Zam, nws xav muab Zam tua pov tseg kom tsis txhob hnov Zam cov lus ntxiv. Thaum tau sij hawm zoo, Hes Los Dias thiaj txw tus ntxhais kom thov Zam lub taub hau.
Kwv tij, Zam tus yam ntxwv, Hes Los tus yam ntxwv, thiab Hes Los Dias tus yam ntxwv zoo qhia peb sawv daws kawg nkaus.
Zam tus yam ntxwv qhia peb kom nyiam ua ncaj, ntxub qhov nkhaus, thaum peb ua qhov ncaj thiab yog mas peb txhob ntshai cov xwv txheej tuaj nphav tuaj raug peb.
Hes Los tus yam ntxwv qhia peb kom tsis txhob muab koob muab npe saib hlob tsam tej ntawd ua rooj ntxiab rov los khi yus.
Hes Los Dias tus yam ntxwv qhia peb kom txhob ua neeg cib nyeej.
Kwv tij, yog peb xaiv ua qhov tsis zoo, mas peb lub siab yuav tsis kaj, peb hnov dab tsi los peb lub siab kawg ntshai thiab yoob xws li Hes Los, nws paub tias nws ua tsis yog lawm mas thaum nws hnov sawv daws hais txog Huab Tais Yes Xus mas nws xav tias yog Zam rov sawv los.
Thaum peb ua ib yam phem, mas yog zoo li peb nyob hauv qhov tsaus ntuj, peb lub siab yoob tas, peb ntxhov siab xws li Hes Los.
Yog peb ua qhov ncaj ua qhov yog, mas zoo li peb nyob hauv qhov pom kev; peb kaj siab.
