ZAJ NYEEM HNUB TIM 7 LUB 12 HLIS: HNUB NCO TXOG LEEJ NTSHIAB AS NPLOS XYUS
COV LUS NYOB PHAU NTAWV HIS XAIS (HX 30: 19-21, 23-26)
LUB MOO ZOO RAWS LI MAS TAIS (MT 9: 35-36, 10: 1, 5-8)
Kwv tij Hmoob sawv daws, hnub no peb hnov hais tias Huab Tais Yes Xus pom tsoom pej xeem sab thiab qaug zog mas Huab Tais Yes Xus hlub lawv, ces Huab Tais Yes Xus hu cov thwj tim los cuag nws thiab muab hwj huam kom lawv ntiab tau dab thiab kho tau mob; ces Huab Tais Yes Xus xa lawv mus tshaj lub Moo Zoo.
Kwv tij, peb sim saib hauv daim tsom iav, peb ntsia peb ob lub qhov muag saib peb muab los ntsia lwm tus neeg li cas. peb puas muab siab rau ntsia, los peb tsuas laim muag ntsia kom pom xwb?
Kwv tij, nyob hauv lub caij Tos Huab Tais no mas xav kom peb muab siab rau ntsia cov neeg nyob puag ncig peb. Peb muab lub siab nyiam los ntsia lawv, peb muab lub siab hlub los ntsia lawv, peb muab lub siab mos nyoos los ntsia lawv, peb muab lub siab dawb siab huv los ntsia lawv. Peb ntsia li ntawd, mas peb yuav pom tias cov neeg nyob ib ncig peb mas lawv sab thiab qaug zog tiag tiag; lawv vam ntsoov kom peb pab lawv.
Kwv tij, peb yog Huab Tais Yes Xus cov thwj tim, peb xyaum ntsia li Huab Tais Yes Xus ntsia, peb muab lub siab hlub los hloov lub siab ntxub, muab lub siab dawb los hloov lub siab dub, muab lub siab dav los hloov lub siab nqaim.
Kwv tij, Huab Tais Yes Xus hais ntxiv tias “Qoob loo ntau kawg, tab sis cov tub zog tsawg. Nej thov tus tswv qoob kom nws xa ib co tub zog tuaj sau nws cov qoob.” Lo lus no yog Huab Tais Yes Xus txhib peb sawv daws kom thov Ntuj tsis tseg kom muaj ib hnub twg Huab Tais Tswv Ntuj tshoj cov neeg lub siab kom lawv txiav siab los ua Tswv Ntuj cov hauj lwm tshaj Ntuj Lus. Tshwj xeeb mas hauv peb cov Hmoob uas tseem muaj cov tub tshaj Ntuj Lus tsawg heev.
Huab Tais Yes Xus pom tias qoob loo ntau, ces nws hu cov thwj tim los thiab muab ‘hwj huam’ rau lawv. Cov hwj huam ntawd yog li no: 1) kom cov thwj tim ntiab tau dab, 2) kom cov thwj tim kho tau tej txiab mob thiab tej mob nkeeg.
Huab Tais Yes Xus txib lawv tias “Nej xub mus cuag cov yaj ploj hauv haiv His Xas Lais tso, nej tshaj tias Ntuj lub Ceeb Tsheej tuaj txog ze lawm, nej kho cov mob kom zoo, nej tsa cov tuag kom ciaj, nej kho cov mob ruas kom huv, nej ntiab dab kom khiav. Tas txhua yam ntawd, mas nej yuav ua pub dawb rau luag.”
Cov lus no nyob rau zim txwv no mas yog Huab Tais Yes Xus txhib peb kom rov tig los saib peb pawg neeg, los pab cawm cov neeg txom nyem nyob hauv peb pab pawg kom lawv ntsib kev kaj siab, kev zoo siab.
Huab Tais Yes Xus yeej muab hwj huam rau peb cov ntseeg txog nws, kom peb ntiab tau dab thiab kho tau mob; yog ntiab tus dab looj koov neeg lub tswv yim, kho tus mob noj neeg lub siab. Yog peb ntiab tus dab thiab tus mob tawm hauv tus twg mus, mas yog peb tau tsa nws tus plig sawv hauv qhov tuag rov los.
Kwv tij, tab sis ua ntej peb yuav ntiab tus dab thiab tus mob hauv lwm tus, peb xub ntiab tus dab thiab tus mob nyob hauv peb tso.
Yog peb tsis ntiab tus dab thiab tus mob nyob hauv peb, mas peb yuav ua li cas mus ntsiab tus dab thiab tus mob nyob hauv cov neeg nyob ncig peb tau.
Peb ntsia lwm tus lawm, peb rov ntsia peb; saib tus dab looj koov peb thiab tus mob tuav rawv peb cia yog dab tsi.
