ZAJ NYEEM HNUB TIM 6 LUB 8 HLI 2024
HNUB RAU LUB LIS PIAM 22 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 5: 33-39)
Kwv tij Hmoob sawv daws, raws cov Yus Das txoj cai mas yuav muaj lub caij yoo mov thiab teev Ntuj kom lawv ua neeg ncaj tuaj. Cov Yus Das ua li ntawd, tab sis lawv pom tias Huab Tais Yes Xus thiab nws cov thwj tim tsis coj cov kab ke yoo raws li cov Yus Das ib txwm ua, lawv thiaj nug txog qhov ntawd.
Huab Tais Yes Xus hais ua piv txwv rau lawv tias nyob hauv rooj tshoob uas cov Yus Das ua lub ntees 7 hnub 7 hmo, mas lawv puas pom tias sawv daws coj kab ke yoo tsis noj mov. Lawv tsuas tos rooj tshoob tiav tas, nraug vauv rov mus lawm, sawv daws mam coj kab ke yoo.
Huab Tais Yes Xus cov lus no, yog nws xav qhia tias nyem no Huab Tais Yes Xus yog tus nraug vauv tuaj noj nws rooj tshoob, tsis phim sawv daws yuav ua cov kab ke yoo, tab sis yog lub caij sawv daws muaj kev zoo siab lom zem. Tos txog thaum Huab Tais Yes Xus rov mus saum ntuj lawm, mas cov thwj tim mam coj kab ke yoo thiab teev Ntuj raws li lawv ib txwm ua kam.
Kwv tij, Huab Tais Yes Xus tseem hais ntxiv rau lawv tias “Thaum nej lub khaub tsho ntuag, nej puas yuav dua ib daim ntaub ntawm lub tsho tshiab los ntxiv? Thaum nej cub tau ib co cawv tshiab, mas nej puas yuav coj mus ntim hauv cov hnab tawv qub? Nej yeej yuav tsis ua li ntawd, vim tias daim ntaub tshiab yuav rub lub tsho ces lub khaub tsho yim ntuag loj tuaj. Nej yeej yuav tsis muab cov cawv tshiab ntim hauv cov hnab tawv qub vim tias cov cawv tshiab yuav ua kom cov hnab tawg. Nej yuav muab daim ntaub qub los ntxiv lub qub tsho, muab daim ntaub tshiab ntxiv lub tsho tshiab. Nej kuj yuav muab cov cawv tshiab ntim rau lub hnab tshiab, cov cawv qub ntim lub hnab qub.
Huab Tais Yes Xus lo lus no yog hais raws li ib txwm cov Yus Das ua kam thiab paub txog. Tab sis lo lus no muaj ib lub ntsiab rau peb. Huab Tais Yes Xus xav qhia peb tias yog peb tsis hloov hloov lub tswv yim tshiab, tsis hloov lub siab tshiab, tsis hloov ua tus neeg tshiab; mas peb ceeb laj yuav to taub Tswv Ntuj lub siab. Ib yam li cov Yus Das, lawv muab lawv khi rau lawv cov kev cai mas lawv thiaj txais tsis tau Huab Tais Yes Xus cov lus. Lawv tsis kam hloov lawv tus kheej, ces lawv zoo li cov neeg tau haus cov cawv laus tas, ces hais tias ‘cawv laus qab dua’.
