ZAJ NYEEM HNUB TIM 6 LUB 8 HLI 2024
HNUB UA HMOOV YES XUS LUB HWJ CHIM TAWM TUAJ
COV LUS NYOB HAUV MAS KOS NTAWV MOO ZOO (MK 9: 2-9)
Kwv tij Hmoob sawv daws, hnub no lub Koom Txoos caw peb los ua hmoov cav txog Huab Tais Yes Xus lub hwj chim tawm tuaj rau 3 tug thwj tim pom. Lub ntsiab hauv lub Moo Zoo hnub no, yog ntuas peb sawv daws kom ‘mloog’ Huab Tais Yes Xus raws li cov thwj tim hnuv lub suab nrov hauv twv huab tuaj tias “Tus no yog kuv Leej Tub uas kuv nyiam, nej mloog nws mog.”
Tos Huab Tais Yes Xus cia nws lub hwj chim tawm tuaj rau Pob Zeb, Yas Kos, thiab Zam pom. Vim tias ua ntej no li 6 hnub, Huab Tais Yes Xus qhia cov thwj tim tias nws yuav raug tsim txom, mas sawv daws ntxhov siab. Huab Tais Yes Xus xav kom lawv tso siab mas nws thiaj puv lub hwj chim rau lawv pom. Tab sis tsis yog tas cov thwj tim yuav pom, Huab Tais Yes Xus tsuas xaiv Pob Zeb, Yas Kos, thiab Zam lawv 3 leeg xwb.
Pob Zeb yuav yog tus ntaus thawj coj cov thwj tim, Yas Kos yuav yog thawj tug tuag ua tim khawv, Zam yuav yog tus ua pov thawj txog txhua yam Huab Tais Yes Xus tau hais tseg.
Kwv tij Hmoob, Leej Txiv Tswv Ntuj lub suab hais kom lawv 3 leeg mloog Huab Tais Yes Xus. Cov thwj tim niaj hnub nrog Huab Tais Yes Xus nyob thiab mloog Huab Tais Yes Xus cov lus qhia. Lawv tseem yuav mloog dab tsi ntxiv?
Qhov Leej Txiv Tswv Ntuj xav kom cov thwj tim mloog, mas yog qhov tias lawv tsis txhob ntxhov siab txog Huab Tais Yes Xus txoj kev yuav raug txom nyem, lawv yuav tau yoog raws Huab Tais Yes Xus; yam li lawv yuav nrauj lawv tus kheej ces lawv yeem ris lawv tus ntoo cuam raws Huab Tais Yes Xus qab.
Niaj hnub no Leej Txiv Tswv Ntuj kuj hais li ntawd rau peb, tsis yog kom peb mloog Huab Tais Yes Xus cov lus qhia nyob hauv lub Moo Zoo, los yog mloog Tswv Ntuj Lo Lus nyob hauv phau Ntawv Ntshiab xwb; Leej Txiv Tswv Ntuj tseev kom peb nrauj peb thiab zoo siab hlo ris peb tus ntoo cuam uas yog peb txoj kev txom nyem. Leej Txiv Tswv Ntuj tsis xav kom peb nroo rau nws tias “Huab Tais, koj tshem qhov txom nyem no tawm ntawm kuv mus mas! Huab Tais, koj ua kiag kom kuv zoo hlo mas!”
Leej Txiv Tswv Ntuj xav kom peb niaj hnub hais rau nws tias “Huab Tais, koj pub lub txiaj ntsim rau kuv kom kuv muaj zog ris tau kuv qhov txom nyem mas! Huab Tais, koj pab kuv kom txawj tso siab rau koj xws li hnub koj Leej Tub raug kev txom nyem mas!”
