Zaj nyeem hnub tim 6 lub 4 hlis 2026
Hnub Ob, Thawj Lis Piam caij Hla
Cov lus nyob hauv Mas Tais Ntawv Moo Zoo (MT 28: 8 – 15)
Kwv tij sawv daws, Huab Tais Yes Xus tau sawv rov los lawm tiag, qhov tseem ceeb tshaj plaws nyob rau hauv peb kev tshaj Ntuj lus yog lo lus tshaj rau nej tias, Huab Tais tau sawv rov los lawm tiag, yog nej mloog thiab nej hnov lawm nej kav tsij zoo siab mog. Nyob rau lub caij Hla no, yog lub caij peb tsoom ntseeg sawv daws, muaj kev zoo siab tshaj plaws, vim qhov tsaus ntuj nti dhau mus qhov pom kev kaj tuaj txog peb lawm. Kev qhia kom neeg sawv daws coj ncaj coj zoo thiab sib hlub yog lub hauv paus thiab txoj hau kev rau peb taug, tiam sisb Huab Tais txoj kev sawv rov los no, yog lub hauv ntsis thiab yog tus yawm sij uas qhib qhov rooj rau peb chaws mus hauv Tswv Ntuj lub Ceeb Tsheej. Thaum peb tau hnov thiab tau txais lawm thov kom peb coj mus tshaj pub rau luag lwm leej lwm tus thiab mog. Hais tias, Huab Tais sawv rov los lawm tiag, nws yuav tsis rov tuag ntxiv, vim nws yeej txoj kev tuag lawm, peb kuj yuav zoo ib yam li ntawd.
Nyob zoo sawv daws.
