ZAJ NYEEM HNUB TIM 5 LUB 9 HLI 2024
HNUB NCO TXOG LEEJ NTSHIAB TES LES XAS KAS KAUS TAS
COV LUS NYOB HAUV LUS KAS NTAWV MOO ZOO (LK 5: 1-11)
Kwv tij Hmoob sawv daws, thaum Huab Tais Yes Xus qhia tsoom sid tas, nws hais rau Pob Zeb kom nquam nkoj mus ntes ntses tom qhov dej tob, Pob Zeb ua raws li Huab Tais Yes Xus hais, mas nws puav tau ntses ntau kawg.
Cov kwv tij, ua ntej no Pob Zeb twb tau ntsib Huab Tais Yes Xus lawm, yog nws tus kwv As Nres coj nws mus cuag Huab Tais Yes Xus. Kuj muaj ib zaug uas Huab Tais Yes Xus hu Pob Zeb kom raws Huab Tais Yes Xus mus. Huab Tais Yes Xus kuj tau mus hauv Pob Zeb tsev, nws kho Pob Zeb niam tais kom zoo ntawm tus mob kub cev.
Raws li hais los no, mas txhais tau tias Pob Zeb twb paub Huab Tais Yes Xus thiab swm Huab Tais Yes Xus lawm, tab sis nws tsis tau ntseeg tas siab tias Huab Tais Yes Xus yog tus tuaj ntawm Tswv Ntuj tuaj. Txawm li ntawd, Pob Zeb kuj mloog Huab Tais Yes Xus hais, Pob Zeb teb rau Huab Tais Yes Xus tias “Xib Hwb, peb twb khwv ib hmos tsis tau dab tsi. Tab sis yog vim koj hais, mas kuv yuav pov cov vas nqes mus.”
Kwv tij, Pob Zeb tsis ua xyem xyav rau Huab Tais Yes Xus, nws khwv thiab sab vim nws puav ntses ib hmos, tab sis nws yeem ua raws li Huab Tais Yes Xus hais, ces nws puav tau ntses tiag.
Kwv tij, nyob hauv peb mas peb kuj yuav ua xws li Pob Zeb; yog thaum peb hnov Tswv Ntuj lub suab hu, los yog hais lus rau peb, mas peb kuj yuav teb tias ‘kuv nyob nov, kuv mam ua li koj hais’.
Yog peb mloog thiab ua raws Tswv Ntuj Lo Lus, mas peb yuav tau txais paj tshab raws li Tswv Ntuj npaj tseg rau peb.
Kwv tij Hmoob, thaum Pob Zeb pom muaj li Huab Tais Yes Xus hais, mas nws ntseeg lawm tias Huab Tais Yes Xus yog tus tuaj ntawm Tswv Ntuj tuaj tiag, Huab Tais Yes Xus yog tus ntshiab, ces nws thiaj txhos caug ntua thov tias “Huab Tais, koj txav mus deb kuv vim kuv yog ib tug neeg txhaum!”
Kwv tij, Pob Zeb paub nws qhov txhaum, nws kuj paub tias nws tsis tsim nyog yuav nrog Huab Tais Yes Xus ua ke. Tab sis Huab Tais Yes Xus tsis cais leej twg, nws tuaj nrhiav cov neeg txhaum. Yog li hnub no, peb kuj yuav nco tias txhua hnub peb tau ua txhaum rau Tswv Ntuj, peb yuav thov Tswv Ntuj zam txhaum rau peb. Peb yuav thov Tswv Ntuj ntxiv zog rau peb kom txhua txhua hnub peb taug tau Tswv Ntuj txoj kev, peb muaj ib lub siab mloog Tswv Ntuj Lo Lus thiab khaws coj mus ua raws.
