ZAJ NYEEM HNUB TIM 5 LUB 7 HLIS 2024
HNUB NCO TXOG LEEJ NTSIAB TUAM NTXAS NKAS LIAS
COV LUS NYOB HAUV MAS TAIS NTAWV MOO ZOO (MT 9: 9-13)
Kwv tij Hmoob sawv daws, lub Moo Zoo nej hnov hauv hnub no yog tus Hauv Paus Xa Lus Mas Tais piav txog thaum Huab Tais Yes Xus tuaj hu nws. Nws yog cov neeg sau se uas cov Fas Lis Xais hais tias yog neeg muaj txhaum, yog cov neeg tsis huv.
Mas Tais tsis piav tias Huab Tais Yes Xus tuaj hu nws zoo li cas thiab nws xav li cas, nws thiaj tso txoj hauj lwm sau se tseg, ces nws mus raws Huab Tais Yes Xus.
Qhov tus Hauv Paus Xa Lus Mas Tais xav qhia rau cov neeg nyeem nws phau ntawv Moo Zoo mas yog nws xav kom sawv daws pom txog Huab Tais Yes Xus txoj kev khuv leej xws li lo lus Huab Tais Yes Xus hais rau cov Fas Lis Xais tias “Nej yuav kawm lo lus no lub ntsiab cia: ‘Qhov kuv xav yuav yog txoj kev khuv leej, tsis yog thaj txi Ntuj.’
Li ntawd mas kwv tij Hmoob, peb ua neej nyob mas peb yuav xyaum coj lub siab hlub thiab khuv leej lwm tus, txawm tias cov neeg phem los cov neeg zoo, mas peb txhob cais.
Thaum peb pom lwm tus ua cov hauj lwm zoo mas peb txhob thuam, txhob rhuav. Peb yuav tau nrog lawv zoo siab mas thiaj tsim nyog.
