ZAJ NYEEM HNUB TIM 5 LUB 6 HLI 2024
HNUB NCO TXOG LEEJ NTSHIAB NPOS NIS FAS
COV LUS NYOB HAUV MAS KOS NTAWV MOO ZOO (MK 12: 18-27)
Kwv tij Hmoob sawv daws, tej zaum nej sawv daws yuav xav zoo li cov Xas Dus Kais xav tias thaum peb mus txog Ntuj lub Ceeb Tsheej los yog thaum peb sawv hauv cov tub tuag rov los lawm, peb puas yuav rov ntsib tus peb hlub tus peb nyiam, peb puas yuav nrog nrog nws ua txij ua nkawm li nyob ntiaj twb no. Peb txhua leej neeg tsis muaj tus twg mus pom ces rov los qhia rau sawv daws paub. Tsuas muaj Huab Tais Yes Xus thiaj qhia tau rau peb xwb vim Huab Tais Yes Xus ib txwm nyob saum ntuj, nws xeeb ua neeg muaj txoj sia thiab tuag sawv rov los. Huab Tais Yes Xus qhia tias thaum ntawd mas neeg yuav zoo li cov Tshiab, lawv tsis sib yuav vim tias lawv tsis yog txiv neej los yog poj niam lawm, lawv yuav nyob rawv hauv Tswv Ntuj lub koob meej, nyob hauv txoj kev nyiam mus li, tsis muaj kev ntshaw.
Kwv tij Hmoob, Tswv Ntuj tsim neeg los tu lub sim ceeb thiab cia neeg ua txiv neej los poj niam kom nkawd tau sib sau ua ib cuab, kom nkawd tau los sib faib Tswv Ntuj txoj kev nyiam thiab pub Tswv Ntuj txoj kev nyiam mus rau nkawd cov me nyuam. Neeg muaj yug los thiab muaj tuag mus, mas neeg thiaj sib yuav los tsim tej tub ki cua kom tau saib xyuas lub sim ceeb. Thaum txog lub caij neeg muaj txoj sia nyob mus li lawd, tsis muaj kev tuag lawm, ces yuav tsis muaj kev yug ntxiv. Neeg txoj hauj lwm tsim noob neej thiab tsis muaj ntxiv lawm. Thaum neeg nyob hauv txoj kev nyiam lawm, neeg thiaj tsis muaj sib sau los tsa cuab ntxiv lawm. Sawv daws yuav ua ib cuab zoo tib yam thiab muaj kev nyiam puv nto hauv nruab siab lawm xwb.
Yog li mas kom nej tso siab tias muaj ib hnub nej sawv daws yuav tau sib ntsib thiab rov tau nyob ua ke, tsis yog li kev ua niam txiv tab sis yog nyob ua ke li ib cuab kwv tij sis nyiam sis hlub. Sawv daws nyob ua ke yam kaj siab lug, sawv daws tsuas muaj kev zoo siab xyiv fab mus li.
