ZAJ NYEEM HNUB TIM 5 LUB 12 HLIS: HNUB TSIB LUB LIS PIAM 1 CAIJ TOS HUAB TAIS
COV LUS NYOB PHAU NTAWV HIS XAIS (HX 26: 1-6)
LUB MOO ZOO RAWS LI MAS TAIS (MT 7: 21, 24-27)
Kwv tij Hmoob sawv daws, thaum Huab Tais Yes Xus pom tsoom sid coob coob raws nws, ces Huab Tais Yes Xus nce mus saum ib lub me nyuam roob, nws qhia lawv txog cov tau txoj hmoov zoo, thiab Huab Tais Yes Xus nthuav Txoj Cai lub ntsiab rau sawv daws mloog. Huab Tais Yes Xus hais nws cov lus tas mas nws thiaj hais cov lus nej hnov nyob hauv hnub no. Huab Tais Yes Xus hais tias leej twg ua raws li cov lus kuv nyuam qhuav hais, mas tus neeg ntawd piv tau rau ib tug neeg xyuam xim txhim tsev rau saum tsua. Thaum los nag hlob, deb sab siv huam thiab cua tshuab ntsawj mas nws lub tsev yuav tsis vau.
Peb tseem tau hnov tus Yaj Saub His Xais ntuas cov Yus Das tias “Huab Tais Tswv Ntuj cia tus neeg tso siab rau Tswv Ntuj nyob thaj yeeb. Nej tso siab rau Huab Tais Tswv Ntuj mus ib txhis, vim Huab Tais Tswv Ntuj yog lub tsua nyob tiam dhau tiam.”
Thaum peb paub li no, peb thiaj to taub tias tus neeg mloog thiab ua raws li Huab Tais Yes Xus cov lus qhia, mas yog nws tso siab rau Huab Tais Yes Xus ces nws tab tom muab nws txoj sia tso rau hauv Huab Tais Tswv Ntuj, nws yuav nyob thaj yeeb mus li.
Kwv tij Hmoob, Huab Tais Yes Xus cov lus qhia lub ntsiab yog hais txog dab tsi? Kawg yog hais txog kev sis nyiam sis hlub; yam li hlub cov neeg txom nyem, nyiam tus ntxub yus, tsim kev haum xeem nrog tus tsis nrog yus nyob ib tog, pub rau tus tsis muaj, pab tus lub zog me. Tej no yog lub ntsiab hauv Huab Tais Yes Xus cov lus qhia.
Li ntawd, Tswv Ntuj cov lus hauv hnub no thiaj yog txhib peb siab kom peb tawm mus tsim txoj kev sis nyiam sis hlub mas peb txoj sia thiaj yuav nyob tau ruaj thiab nyob thaj yeeb mus li.
Kwv tij, peb ua neej nyob hauv lub qab ntuj no mas muaj ntau yam kev haub kev ntxias tuaj raug peb tsis tseg, peb yuav thov Huab Tais Tswv Ntuj pub kev thoob tsib rau peb, kom peb ua tau tus neeg xyuam xim coj lub neej mus raws li Huab Tais Yes Xus cov lus qhia, kom peb txhob ua neeg ruam saib ntiaj teb lub cuab tam, neeg lub siab ntshaw los ua qhov loj.
Kwv tij Hmoob sawv daws, lub caij Tos Huab Tais no, peb yim mloog thiab yim ua raws li Huab Tais Yes Xus cov lus qhia kom peb sis nyiam sis hlub, mas hnub Huab Tais Yes Xus tuaj txog, peb thiaj muaj cuab kav tsa ncauj hais tias “Yes Xus, koj yog kuv tus Huab Tais.” Nyob zoo sawv daws.
