ZAJ NYEEM HNUB TIM 31 LUB 3 HLIS 2025
HNUB OB LIS PIAM 4 CAIJ PLAUB CAUG
(Z 4: 43-54)
Kwv tij Hmoob sawv daws peb ua neej nyob yog kom peb ntseeg ib yam dab tsi mas cia peb pom yam ntawd tso; yam li yog muaj neeg hais rau peb tias nab yug me nyuam tau mas peb yeej tsis ntseeg, tab sis thaum peb pom nab ntsuab yug me nyuam lawm peb mam li ntseeg tias muaj tej yam nab kuj yug me nyuam thiab.
Hnub no lub Moo Zoo xav twv peb saib peb puas muaj siab ntseeg tej yam peb qhov muag tsis pom li tau hais ua piv txwv tas los ntawd. Yog nej mus ua hauj lwm deb vaj deb tsev deb nej tus txij nkawm ntev xyoo yam li mus ua nyob txawv teb chaws. Nyob nyob muaj neeg hais rau nej tias nej tus txij nkawm deev hluas lawm, nej hnov li ntawd nej yuav ntseeg los tsis ntseeg?
Yog nej ntseeg mas dab tsi ua rau nej ntseeg. Yog nej tsis ntseeg mas vim tus dab tsi nej thiaj tsis ntseeg.
Hnub no tus thawj tub rog nyob Kas Fas Naus hnov tias Huab Tais Yes Xus rov los txog lub zos Kas Nas lawm, nws maj zeem sawv kev tuaj cuag Huab Tais Yes Xus kom tau thov Huab Tais Yes Xus mus kho nws tus me nyuam. Huab Tais Yes Xus tsis mus, nws tsuas hais tias “Koj rov mus mog. Koj tus tub zoo law.”
Tus thawj tub rog ua li cas? Nws puas puas tso siab rau lo lus Huab Tais Yes Xus hais rau nws, los nws tseev kom Huab Tais Yes Xus nrog nws mus kom tau?
Tus thawj tub rog ntseeg, nws cia li rov mus tsev. Nws tso siab tias Huab Tais Yes Xus lo lus muaj hwj chim tab txawm Huab Tais Yes Xus tsis mus los Huab Tais Yes Xus yeej ua tau hwj huam kho nws tus me tub kom zoo.
Qhov no yog nws lub siab ntseeg. Nws tsis pom tab sis nws ntseeg.
Rov los ntawm lo lus pic txwv puag ta; tus mus ua hauj lwm deb yog nws tso siab rau nws tus txij nkawm nyob tom vaj tom tsev, nws yeej yuav ntseeg tias nws tus txij nkawm tsis ua li cov lus luag hais. Tus tsis tso siab rau nws tus txij nkawm, nws yuav ntseeg luag tej cov lus tias nws tus txij nkawm deev hluas tiag.
Xav kom peb cov Hmoob mloog Tswv Ntuj Lo Lus hauv hnub no, khaws coj mus xav saib peb puas tso siab rau Huab Tais Yes Xus txawm tias peb tsis pom Huab Tais Yes Xus.
Kwv tij, peb tso siab rau Huab Tais Yes Xus mas peb thiaj yuav ntseeg txog Huab Tais Yes Xus mog.
Nyob zoo.
