ZAJ NYEEM HNUB TIM 30 LUB 8 HLI 2024
HNUB RAU LUB LIS PIAM 21 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 25: 1-13)
Kwv tij Hmoob sawv daws, yog nej yog neeg ntseeg thiab nyiam mus thov Ntuj rau tus tuag nyob hauv lub ntees, mas nej yuav hnov Txiv Plig los Xib Hwb lawv coj zaj Moo Zoo no los nthuav rau lub txoos mloog, vim tias zaj Ntawv Moo Zoo no zoo qhuab tuas cov neeg ntseeg kom ua neeg xyuam xim npaj lub neej thaum tseem muaj txoj sia nyob kom txhij, txhob ua li cov niam txais ntsuab ruam tsis npaj roj taws teeb.
Lub ntsiab hauv zaj no mas peb nyiam nthuav mus zoo li ntawd, vim yog ib yam pom tseeb kawg.
Kwv tij Hmoob, peb yug los ua neeg mas Tswv Ntuj muab ib leeg ib lub teeb rau peb, tab sis cov roj mas peb tsum tau nrhiav.
Peb nrhiav tau li cas, puas yog muab nyiaj mus muas tom kiab khw.
Tsis yog li ntawd, cov roj yuav ntim rau peb lub teeb yog cov hauj lwm xis Tswv Ntuj siab yam li kev sib tsob hwb.
Peb tsis txhob ua li cov ruam tsis xyuam xim, tsis npaj roj; yam li peb ua neej nyob peb tsis nyiam pab lwm tus, tsis nyiam hlub lwm tus.
Kwv tij, lub caij nraug vauv tuaj txog ces yog lub caij Huab Tais Yes Xus yuav rov los. Thaum ntawd, yuav muaj zoo li cov lus Huab Tais Yes Xus tau hais tseg tias nws yuav cais cov neeg ua 2 pab; ib pab yog cov neeg hlub thiab tsob hwb cov neeg txom nyem, ib pab yog cov neeg tsis pom txog lwm tus txoj kev txom nyem ces lawv tsis muab siab rau hlub cov neeg txom nyem ntawd.
Huab Tais Yes Xus hais tias “Nej tau ua li cas rau cov me tshaj hauv kuv tsoom kwv, mas yog nej ua rau kuv.”
Qhov no yog cov roj peb yuav nrhiav npaj tseg thaum nraug vauv tsis tau tuaj. Qhov no yog cov hauj lwm peb yuav ua thaum tseem muaj txoj sia nyob.
Niaj hnub mas peb yeej sab thiab lim lim, ces peb nkees thiab tsaug dab ntub. Li ntawd, peb thiaj yuav maj ua maj nrhiav thaum peb tseem muaj zog, tseem ntxov.
