ZAJ NYEEM HNUB TIM 30 LUB 12 HLIS 2025
HNUB TSIB, TOM QAB YES XUS YUG LOS
COV LUS NYOB HAUV LUS KAS NTAWV MOO ZOO (LK 2: 36-40)
Kwv tij sawv daws, Huab Tais Yes Xus Yog Los, yog ib qhov kev zoo siab rau ntiaj teb neeg sawv daws tias, Tswv Ntuj tau nqes los nyob nruab nrab peb.
Nyob rau hauv zaj hnub no, ib tug Yaj Saub poj niam, ua nws lub npe hu ua As Nas, nws tau tshaj txog txoj kev zoo siab no rau ib zeej tsoom neeg sawv daws, uas chaws mus los hauv lub Tuam Tsev Teev Ntuj nyob Les Lus Xas Les. Kom sawv daws pom tias, txhua tus neeg yug los, muaj peev xwm coj zoo thiab ua zoo tau, thiab tsim koob hmoov rau lub ntiaj teb no tau, tsis yog cov neeg muaj nyiaj thiaj ua tau xwb.
Tswv Ntuj lub Ceeb Tsheej los txog peb sawv daws lawm, tus tau txoj hmoov zoo yog tus txawj mloog Tswv Ntuj lub Moo Zoo. Tswv Ntuj cov tub Tshaj Ntuj Lus, tsis yog cov neeg muaj nyiaj, tsis yog cov neeg txawj neeg ntse, tiam sis, yog cov neeg muaj lub siab zoo thiab ntseeg txog Tswv Ntuj, coj raws li Tswv Ntuj cov lus qhia. Ces lawv muab Tswv Ntuj txoj kev nyiam kev hlub los ntau thawj, qhov kawg lawv yuav muaj lub koob meej nyob hauv Tswv Ntuj mus ib txhis.
Tus tau hnov thiab tau mloog Tswv Ntuj lub Moo Zoo yog nws muaj txoj hmoov zoo, vim muaj coob tug uas xav hnov, tiam sis, lawv tsis tau hnov.
