ZAJ NYEEM HNUB TIM 30 LUB 1 HLIS 2024
HNUB PEB LUB LIS PIAM 4 CAIJ NYOB NRUAB XYOO
COV LUS NYOB HAUV MAS KOS NTAWV MOO ZOO (MK 5: 21-43)
Cov Hmoob sawv daws, tom qab Huab Tais Yes Xus lawv caij nkoj ntawm Nkes Las Xes teb rov los txog sab ntug dej ntuj tim Nkas Lis Lais teb, muaj neeg coob tuaj ntsauv Huab Tais Yes Xus. Peb sim muab xav saib, yog thaum muaj ib tug tub hu nkauj nto npe tuaj txog hauv zos, tas sawv daws mus sib sau saib tus tub hu nkauj ntawd zoo li cas, mas nyaj tej zaus thaum lawv tuaj ntsauv Huab Tais Yes Xus kuj yuav zoo li ntawd thiab. Lawv cov ntawd, ib txhia yog xav pom Huab Tais Yes Xus, ib txhia yog tuaj nyob ze kom tau hnov Huab Tais Yes Xus hais lus, ib txhia kuj yog tuaj thov kev pab ntawm Huab Tais Yes Xus. Tab sis lub Moo Zoo tsuas piav rau peb txog 2 tug neeg tau txais kev cawm; yog Yais Los thiab tus poj niam tsob ntshav. Nkawd 2 tug no muaj ib yam zoo tib yam; yog nkawd muaj lub siab ntseeg thiab tso siab rau Huab Tais Yes Xus.
Yais Los ntseeg txog Huab Tais Yes Xus, nws thiaj txhos caug ntua ntawm Huab Tais Yes Xus ko taw thiab thov tias “Thov koj mus tsa tes cawm kuv tus me ntxhais kom txhob tuag yuad.”
Tus poj niam tsob ntshav ntseeg txog Yes Xus, nws thiaj xav twj ywm hauv siab tias “Tsuav yog kuv tau kov Yes Xus lub tsho xwb, mas kuv yeej yuav dim”, ces nws thiaj cev tes mus kov Huab Tais Yes Xus lub tw tsho.
Kwv tij Hmoob sawv daws, 2 tus neeg no muaj lub siab ntseeg thiab tso siab rau Yes Xus; yog nkawd ntseeg txog Yes Xus mas nkawd thiaj ua kom tau kev cawm ntawm Huab Tais Yes Xus.
Muaj coob leej ntau tus tau nqes tes ua, tab sis lawv tsis ntseeg txog Huab Tais Yes Xus ces Huab Tais Yes Xus kuj cawm tsis tau lawv. Muaj coob leej ntau tus ntseeg txog Huab Tais Yes Xus tab sis lawv tsis nqes tes ua kom tau txais kev cawm, mas Huab Tais Yes Xus kuj cawm tsis tau lawv thiab.
Hnub no, vam tias peb cov kwv tij Hmoob ua Ntuj kev cai lawd, peb txhob ntseeg xwb, tab sis peb tsum ntseeg txog Huab Tais Yes Xus; yog muab lub siab coj los ntseeg thiab tso siab rau Huab Tais Yes Xus, ces peb ua raws li qhov peb tso siab ntawd; txog thaum kawg peb thiaj yuav tau txais kev cawm ntawm Huab Tais Yes Xus xws li Yais Los thiab tus poj niam tsob ntshav hauv lub Moo Zoo hnub no.
Nyob zoo sawv daws.
