ZAJ NYEEM HNUB TIM 3 LUB 7 HLI 2025
HNUB UA HMOOV LEEJ NTSHIAB TOS MAS
COV LUS NYOB HAUV ZAM NTAWV MOO ZOO (Z 20: 24-29)
Kwv tij Hmoob sawv daws, hnub no lub Koom Txoos ua hmoov Leej Ntshiab Tos Mas, tus Hauv Paus Xa Lus. Ntawv Moo Zoo hais txog Tos Mas li cas?
Nyob hauv Zam Ntawv Moo Zoo hais ob peb nqe txog Tos Mas li no:
Thaum Las Ntxas Los tuag lawm, Yes Xus hais rau cov thwj tim tias nws yuav rov mus tsa Las Ntxas Los sawv, ces cov thwj tim cheem Yes Xus, lawv hais tias cov Yus Das twb yuav xuas pob zeb txawj Yes Xus kom tuag, ua cas Yes Xus thiaj yuav rov mus Yus Das teb. Tos Mas tus uas hu ua ‘Dis Dws Mos’ hais rau cov npawg tas “Peb kav tsij mus mas, kom peb nrog nws tuag thiab” (Z 11: 1-17).
Zam tseem sau ib lwm txog Tos Mas thaim Yes Xus hais nws cov lus ncaim; Yes Xus hais tias “Nej paub txoj kev mus txog qhov chaw kuv yuav mus.” Tos Mas hais rau Yes Xus tias “Huab Tais, peb tsis paub koj yuav mus qhov twg. Peb yuav ua cas paub txoj kev?” Yes Xus hais rau Tos Mas tias “Kuv yog Txoj Kev, Qhov Tseeb, thiab yog Txoj Sia. Tsis muaj leej twg mus cuag Leej Txiv tau, yog nws tsis los ntawm kuv. Yog nej paub kuv, mas nej kuj paub kuv Txiv thiab” (Z 14: 4-6).
Zaum tim peb uas Zam sau txog Tos Mas, yog tom qab Yes Xus sawv hauv tub tuag teb rov los, Yes Xus tawm tuaj xyuas cov thwj tim raws li zaj lus hauv hnub no. Tos Mas hais rau cov npawg tias “Yog kuv tsis pom lub qhov txhawb ntsia hlau nyob hauv Huab Tai sob txhais tes, yog kuv tsis tau muab kuv ntiv tes ntxig lub qhov ntsia hlau, thiab yog kuv tsis tau muab kuv txhais tes rau ntawm Huab Tais phab tav, mas kuv tsis ntseeg.”
Sawv daws hais npaum cas los Tos Mas yeej tsis ntseeg li, ces yim hnub tom qab Huab Tais Yes Xus rov tawm tuaj, Huab Tais Yes Xus hais rau Tos Mas kom ua raws li Tos Mas tau hais. Thaum ntawd, Tos Mas thiaj mam ntseeg, ces nws hais cov lus pov thawj tias “Kuv tus Huab Tais, kuv tus Tswv Ntuj.”
Kwv tij, raws li lub Koom Txoos cov kwv huam, mas lawv hais tias Tos Mas yug los nyob hauv Nkas Lis Lais teb, thiab tuag ua tim khawv xyoo 72 lub 12 hlis tim 21 nyob Is Ntias teb.
Tab txawm peb paub txog Leej Ntshiab Tos Mas me me li hais los no xwb, tsis kav yog peb muab ua tib zoo xav mas yuav pom tias Leej Ntshiab Tos Mas yog ib tus neeg kub siab raws Huab Tais Yes Xus, nws thiaj hais tias “Yog Las Npis yuav rov mus qhov chaw luag yuav muab nws tua, los cia peb kav tsij nrog nws mus, yog lawv xuas pob zeb txawb nws tuag, mas peb kuj yuav nrog nws tuag thiab.”
Peb pom tias Tos Mas yog ib tus neeg xav paub qhov tseeb, ces thaum Huab Tais Yes Xus hais txog tej yam nws tsis to taub mas nws nug kom to taub, Tos Mas hais tias “Las Npis, koj hais txog txoj kev yuav coj peb mus txog qhov chaw kuj mus, txoj kev ntawd yog txoj twg mas, kuv tsis paub. Thov koj qhia kuv”, ces Huab Tais Yes Xus thiaj qhia tias txoj kev ntawd yog Huab Tais Yes Xus kiag. Tus twg nrhiav Huab Tais Yes Xus, tus ntawd yuav pom txoj kev coj mus cuag Tswv Ntuj lub Ceeb Tsheej.
Peb pom tias Tos Mas yog neeg xyuam xim, nws tsum pom tso nws mam ntseeg cov lus luag lwm tus hais, tab sis thaum nws nrhiav tau qhov tseeb lawm, nws tso siab rau qhov tseeb ntawd, mas thaum Tos Mas pom Huab Tais Yes Xus sawv rov los lawm tiag, nws thiaj hais tias “Yes Xus, koj yog kuv tus Huab Tais thiab koj yog kuv tus Tswv Ntuj tiag.”
Peb pom raws li hais los no, yog li peb yuav muab coj mus siv coj mus txhim kho peb lub neej puas yuav tau.
Raws li xav mas Leej Ntshiab Tos Mas 3 tus xeeb ceem no zoo pab peb kom paub peb txoj kev ntseeg zoo dua tuaj. peb yuav kub siab raws Huab Tais Yes Xus, yam twg tsis to taub mas peb nug kom paub thiab nkag siab mas peb thiaj tsis yuam kev, peb ua neeg xyuam xim nrhiav qhov tseeb nyob hauv txoj kev ntseeg.
