ZAJ NYEEM HNUB TIM 3 LUB 6 HLI 2024
HNUB NCO COV TIM KHAWV US KAS NTAS
COV LUS NYOB HAUV MAS KOS NTAWV MOO ZOO (MK 12: 1-12)
Kwv tij Hmoob sawv daws, lub Moo Zoo nej hnov hauv hnub no yog ib zag paj lug Huab Tais Yes Xus muab los piv rau cov Yus Das tsis kam ntseeg txog nws. Hnub no Huab Tais Yes Xus zaj paj lug no zoo qhia dab tsi rau peb? Niaj hnub peb puas ua lub neej zoo li cov zov teb tua neeg ntawd?
Nyob hauv peb cov Hmoob lub neej, tej zaum peb pom tias muaj tej tus muaj nyiaj nplua nuj dua cov, ces nws ua tej lub tsev cia rau cov neeg tuaj nyob, nws khaws nyiaj ntawm cov neeg tuaj nyob ntawd; muaj tej tus neeg cog ntoo tso kua roj hmab, ces nws nrhiav neeg mus zos mus tus, thaum muag tau mas muab nyiaj sib faib ib leeg ib nrab. Tus neeg zoo mas nws kuj yuav them nqe tsev rau tus tswv tsev, tus neeg ncaj nws yuav nrog faib nyiaj ib leeg ib nrab nrog tus tswv teb. Tab sis tus phem thiab siab nkhaus mas nws tsis ua li ntawd.
Cov kwv tij, zaj paj lug hais tias tus tswv teb txiv cawv tso nws cov tub txib mus nqa nws feem ntawm cov neeg zov teb, tab sis cov zov teb tsis yeem, lawv muab tus tswv teb cov tub txib tua, lawv tseem tua tus tswv teb tus tub thiab. Lawv siab nkhaus siab phem kawg!
Niaj hnub, Huab Tais Tswv Ntuj xa Huab Tais Yes Xus tuaj nrhiav peb, xa Huab Tais Leej Ntuj Plig tuaj kaj peb lub tswv yim, tsis kav peb tsis kam mloog Huab Tais Yes Xus thiab txais Leej Ntuj Plig los nyob hauv peb. Peb puas zoo li cov zov teb tua neeg hauv zaj paj lug hnub no?
Huab Tais Tswv Ntuj yog tus tsim peb los, Huab Tais Tswv Ntuj pub txoj sia rau peb; yog li peb thiaj yog Huab Tais Tswv Ntuj tug. Huab Tais Tswv Ntuj yog peb tus tswv, ib yam li daim teb txiv cawv yog tus tswv teb daim teb.
Kwv tij Hmoob, txhua hnub Huab Tais Leej Txiv xa nws Leej Tub tuaj nrhiav peb, hu peb kom rov mus cuag nws. Nyob ntawm peb ntiag tug saib nyias puas yuav mloog thiab cia Huab Tais Yes Xus los nrog nyias nyob, nyob ntawm peb ntiag tug saib puas yeem cev Huab Tais Tswv Ntuj fem rov rau Huab Tais Tswv Ntuj. Yog peb mloog thiab cev peb rau Huab Tais Tswv Ntuj mas Huab Tais Tswv Ntuj yuav txuag peb thiab cais peb ua nws ntiag tug. Yog peb tsis mloog thiab tiv Huab Tais Tswv Ntuj ces peb yuav raug rho tawm hauv Tswv Ntuj daim teb txiv cawv.
