ZAJ NYEEM HNUB TIM 29 LUB 8 HLI 2024
HNUB NCO TXOG ZAM RAUG TXIAV TAUB HAU
COV LUS NYOB HAUV MAS KOS NTAWV MOO ZOO (MK 6: 17-29)
Kwv tij Hmoob sawv daws, hnub no yog hnub peb lub Koom Txoos Kav Tos Liv tus vaj Hes Los muab Zam Ntxuav Plig txiav tau hau raws li cov lus tus Hauv Paus Xa Lus Mas Kos piav nyob hauv nws phau Ntawv Moo Zoo.
Mas Kos piav tias thaum Hes Los hnov Zam cov lus ntuas kom txhob mus nqaws nws tus niam tij los ua poj niam, mas Hes Los paub tias Zam hais yog kawg, ces Hes Los hwm Zam thiab nyiam mloog Zam cov lus tab sis vim nws tso tej yam yuam kev tsis tau mas Hes Los thiaj ntxhov siab tas zog. Tab sis ntawm Hes Los Dias mas tsis zoo li ntawd, nws ntxub Zam Ntxuav Plig.
Txog hnub tsuj xeeb Hes Los yug, Hes Los Dias tus ntxhais dhia seev cev tau ntxim sawv daws siab. Hes Los cog lus tias yuav muab rau nws raws li nws thov, ces tus ntxhais thov Zam Ntxuav Plig lub taub hau rau nws niam. Hes Los ua tsis tau li cas, nws thiaj kom cov keeb mus txiav Zam Ntxuav Plig lub taub hau.
Kwv tij Hmoob, Zam Ntxuav Plig ua tim khawv txog qhov tseeb tias ib tug txiv neej tsis phim yuav mus txeeb lwm tus tej poj niam los ua nws tug, vim thaum lub hauv paus Tswv Ntuj tsim ib tug poj niam los ua ib tug txiv neej tus tav xwb.
Hes Los nws paub tias nws tau ua txhaum, nws tseem paub tias yog nws muab Zam tua mas haj yam txhaum, tab sis nws ntshai poob meej mom ces nws yeem muab Zam Ntxuav Plig tua. Hais tau tias Zam Ntxuav Plig tuag rau qhov tseeb, Hes Los tuag rau txoj kev nyiam lub meej mom suab npe, Hes Los Dias tuag rau txoj kev ntxub Zam Ntxuav Plig.
Kwv tij Hmoob, ntawm peb ne, peb yuav tuag rau dab tsi?
Peb yog ib tug neeg ntseeg txog Yes Xus, hais tau tias peb yog Huab Tais Yes Xus cov thwj tim, mas peb thiaj yuav tau kawm ntawm peb tus tseem Xib Hwb uas yog peb tus Huab Tais Yes Xus.
Huab Tais Yes Xus tuag vim qhov tseeb, vim txoj kev nyiam lub ntiaj teb neeg, vim txoj kev zam rau sawv daws. Li ntawd mas cov kwv tij, peb ua neej nyob peb thiaj yuav tau ua tim khawv txog qhov tseeb, kev sis nyiam sis hlub, thiab kev sib zam txim.
Peb yuav qhov tseeb peb thiaj tsis yuam kev, peb sis nyiam sis hlub peb thiaj paub txo peb lub hwj chim lub meej mom pov tseg, peb yuav sib zam mas txoj kev ntxub thiaj tsis txawv nyob hayv peb.
