ZAJ NYEEM HNUB TIM 28 LUB 8 HLI 2025
HNUB NCO TXOG LEEJ NTSHIAB AUS NKUS TIS NUS
COV LUS NYOB HAUV MAS TAIS NTAWV MOO ZOO (MT 24: 42-51)
Kwv tij sawv daws, dab ntxwg nyoog uas yog tus thawj dab loj, nws nug 3 tug dab hluas tias “Yuav ua li cas thiaj ua rau neeg poob dab teb kom coob tshaj plaws.” Ces ib tug hluas dab teb tias “Yuav qhia rau neeg tias tsis muaj Tswv Ntuj.” Tus 2 teb tias “Yuav hais rau neeg tias tsis muaj dab phem teb”, ces ntxwg nyoog nthe tias “Hais li ko tsis tau, neeg yuav tsis ntseeg!”
Ces tus hluas dab tim 3 teb tias “Yuav hais rau neeg tias tseem tshuav sij hawm ntau.” Ces tus ntxwg nyoog qhuas tias “Zoo kawg, yog ib lo lus teb uas zoo heev.”
Huab Tais Yes Xus paub tias, kev uas yus xav tias tseem tshuav sij hawm ntau rau yus, tsis txhob maj, tsis txhob maj ntseeg, txhob maj tig los yuav lub siab tshiab, yog ib txoj kev xav uas txaus ntshai, yuav ua rau yus tus ntsuj plig poob rau hauv dab teb tau. Li ntawd, ntawv Moo Zoo hnub no, qhia kom peb yuav tsum ceev faj, yuav tsum ua neeg xyuam xim, npaj kom txhij tos, vim Neeg Leej Tub yuav tuaj rau lub sij hawm uas peb tsis nco ceev faj.
Kwv tij sawv daws, peb txoj sia nyob ntiaj teb no luv luv kawg li, thov kom peb ua neeg ceev faj mog, thaum peb paub tias peb muaj txhaum lawm, peb kav tsij hloov siab sai, tig los nrhov Tswv Ntuj thiab thov zam txhaum ntawm nws, peb thiaj yuav dim.
Nyob zoo sawv daws.
