ZAJ NYEEM HNUB TIM 28 LUB 8 HLI 2024
HNUB NCO TXOG LEEJ NTSHIAB AUS NKUS TIS NUS
COV LUS NYOB HAUV MAS TAIS NTAWV MOO ZOO (MT 23: 27-32)
Kwv tij Hmoob sawv daws, Huab Tais Yes Xus hais tias cov Kws Ntawv Ntshiab thiab cov Fas Lis Xais zoo nraum daim tawv.
Lo lus ‘zoo nraum daim tawv’ yog lo lus siv rau cov neeg ua tus yeeb yam rau luag tej pom tias nws yog tus neeg zoo tab sis qhov tseeb tiag mas nws tsis zoo xws li tus yeeb yam nws ua tawm los. Piv li cov neeg thaum hais lus mas nws hais li no tab sis thaum ua mas nws ua nws ib yam. Piv li tus neeg pluag txom nyem tab sis nws ua tus niag tsab muaj kom luag tej pom ces luag xav tias nws yog neeg muaj. Cov neeg zoo li no tsis yog nws dag luag tej ob cag xwb, nws tseem dag nws thiab.
Hnub no Huab Tais Yes Xus thiaj hais tias cov neeg zoo nraum daim tawv ces zoo li cov ntxa pleev hmoov zeb sib sab nraud kom sawv daws pom tias lub ntxa tshiab thiab zoo saib, tab sis nyob sab hauv mas tsuas yog cov pob txha thiab tej kua lwj nyam puv nkaus.
Huab Tais Yes Xus tseem hais tias cov neeg zoo sab nraud, mas thaum luag lwm tus hais txog tej tus neeg ua tsis zoo, mas lawv txais nkaus tias yog kuv mas kuv tsis ya li lawv kiag li; xws li cov Kws Ntawv Ntshiab thiab cov Fas Lis Xais nyiam hais tias “Yog peb ua neej nyob lub caij thaum peb cov yawg koob hiam cov Yaj Saub, mas peb yuav tsis nrog lawv raus tes tua cov Yaj Saub ib yam li peb cov yawg koob.”
Kwv tij Hmoob, muaj ntau zaus peb ua zoo li tus neeg zoo sab nraud. Thaum ntawd mas peb tsis nco qab, tsuas yog thaum muaj ib tug hais qhia mas peb thiaj paub. Los ib txhia yeej tab meeg ua tus neeg zoo sab nraud li ntawd.
Hnub no, peb yuav rov tig los saib sab hauv peb, tig ntsia peb tus cwj pwm, saib peb puas ua tus neeg zoo sab nraud tab sis sab hauv mas lwj kas nti.
Lub Koom Txoos qhia tias yog peb xav kom txhob ua tus neeg zoo sab nraud li hais los no, mas peb yuav xyaum ua tus neeg ncaj, qhib siab rau sawv daws, ua ib tug neeg me me xws li tej me nyuam.
