ZAJ NYEEM HNUB TIM 28 LUB 3 HLIS 2024
HNUB TSIB NTSHIAB
COV LUS NYOB HAUV ZAM NTAWV MOO ZOO (ZM 13: 1-15)
Kwv tij Hmoob sawv daws, nyob hauv hnub no yog ncaj rau hnub Huab Tais Yes Xus noj pluas mov kawg. Hnub ntawd Huab Tais Yes Xus tau ua 3 yam no: ntxuav cov thwj tim taw, tsa lub Cim Yug, thiab qhia txoj cai tshiab.
Huab Tais Yes Xus hais tias “Nej puas to taub qhov kuv ua rau nej? Nej hu kuv ua Xib Hwb thiab Huab Tais, mas nej hu raug lawm. Txawm tias kuv yog nej tus Xib Hwb thiab Huab Tais, tsis kav kuv ntxuav nej ko taw. Qhov kuv ua rau nej pom, mas nej yuav ua zoo li ntawd thiab.”
Kwv tij, Huab Tais Yes Xus cov lus no yog kom peb sib hwm, sib nyiam sib hlub. Peb txhob muab lub hwj chim neeg tis rau peb los saib ua qhov loj, ces peb tsis pom txog lwm tus. Peb yuav tau paub hle lub meej mom pov tseg, mas peb thiaj yuav txawj tsob hwb lwm tus.
Hnub no, nyob hauv lub Txoos mas thiaj ua raws Huab Tais Yes Xus tus piv txwv no, yog tus Leej Choj yuav ntxuav cov neeg ntseeg txhais ko taw.
Kwv tij Hmoob, thaum peb saib tus Leej Choj ntxuav cov ntseeg ko taw li ntawd mas kom peb nco tias Huab Tais Yes Xus yog cov thwj tim tus xib hwb, yog Tswv Ntuj Leej Tub, yog tus loj tshaj sawv daws; Huab Tais Yes Xus twb yeem ua tus me tshaj sawv daws, mas peb kuj yuav yoog raws li Huab Tais Yes Xus.
Kwv tij, txhua zaus thaum peb sib sau tuaj koom Thaj Txi Ntuj txais Yes Xus lub Cev mas kom peb nco tias Huab Tais Yes Xus tau qhia kom peb sis nyiam sis hlub xws li Huab Tais Yes Xus hlub thiab nyiam peb, ces nws yeem tuag kom tau cawm peb.
Nyob zoo sawv daws.
