ZAJ NYEEM HNUB TIM 28 LUB 1 HLIS 2025
HNUB NCO TXOG LEEJ NTSHAB TOS MAS AS KIS NOS
HN 10: 1-10; MK 3: 31-35
Kwv tij Hmoob thaum Huab Tais Yes Xus tsev neeg hnov cov neeg tuaj Yes Lus Xas Les tuaj liam rau Yes Xus tias nws raug dab thiab hu txog dab tuaj kho neeg, mas lawv txhawj ces lawv thiaj tuaj nrhiav Huab Tais Yes Xus. Ntawv Moo Zoo yeej hais rau peb paub lawm tias Tswv Ntuj tus Tshiab qhia Mab Liab paub tias Huab Tais Yes Xus yog Tswv Ntuj Leej Tub, yog li mas peb thiaj ntseeg tau tias Mab Liab yeej tsis xav tias nws Leej Tub raug dab tab sis ntawm cov kwv tij mas ntshai lawv yuav xav xws li cov neeg tuaj liam. Mab Liab kawg txhawj tsam cov neeg siab phem ua tsis zoo rau nws tus tub vim thaud tus yawg laus Xis Mes Oos cov lus hais txog Huab Tais Yes Xus thiab Mab Liab kev mob siab vim nws tus tub Yes Xus.
Thaum muaj neeg pom Mab Liab thiab Huab Tais Yes Xus cov kwv tij, lawv hais rau Huab Tais Yes Xus paub. Tab sis cov lus Huab Tais Yes Xus hais rau sawv daws mas yog cov lus no:
“Leej twg ua raws li Tswv Ntuj lub siab, tus ntawd yog kuv ib leeg kwv, ib leeg muam thiab ib leeg niam.”
Tsis yog Huab Tais Yes Xus tsis kam yuav Mab Liab ua nws niam, tsis xav yuav cov neeg hauv nws tsev ua nws cov kwv tij. Huab Tais Yes Xus pom tias tas txhua tus neeg mloog Tswv Ntuj thiab ua ntxim Tswv Ntuj siab mas lawv puav leej yog Huab Tais Yes Xus niam, Huab Tais Yes Xus cov kwv, thiab Huab Tais Yes Xus cov muam.
Huab Tais Yes Xus saib nws tsev neeg dav dua ntiaj teb kev sib txheeb ze. Ntiaj teb neeg hais tias tus yug lawv yog lawv niam, tus koom ib caj ces nrog lawv yog lawv cov kwv tij nkauj muam. Cov neeg dhau li hais mas tsis yog lawv cov tsev neeg lawm.
Huab Tais Yes Xus tsis saib cov koom roj ntsha nrog nws thiaj yog nws tsev neeg, yog nws kwv nws tij, yog nws muam. Huab Tais Yes Xus saib cov ua xis Tswv Ntuj siab yog nws cov kwv tij, yog nws tsev neeg.
Ntawv Moo Zoo qhia peb tias Huab Tais Yes Xus yog Leej Lo Lus tawm ntawm Tswv Ntuj tuaj. Tswv Ntuj lub siab xav li cas ces Tswv Ntuj hais tawm los ua Lo Lus, yog li Huab Tais Yes Xus thiaj yog qhov ‘xis Tswv Ntuj siab’. Tus twg xav ua xis Tswv Ntuj siab mas tus ntawd yuav ua raws Huab Tais Yes Xus.
Yog li mas hnub no Huab Tais Yes Xus thiaj hais tias “Kuv niam, kuv cov kwv, thiab kuv cov muam yog cov ua raws li kuv; yam li nyiam sawv daws, hlub cov neeg txom nyem, siab zoo, siab mos, tsis saib yus loj, yeem ris yus tus ntoo cuam.
Peb pom tias muaj ib tug ua raws nraim li Huab Tais Yes Xus; tus ntawd yog ‘Mab Liab’ Yes Xus niam.
