ZAJ NYEEM HNUB TIM 27 LUB 5 HLIS 2025
HNUB NCO TXOG LEEJ NTSHIAB AUS NKUS NYOB KAAS TAS NPES LIS
COV LUS NYOB HAUV ZAM NTAWV MOO ZOO (Z 16: 5-11)
Kwv tij Hmoob sawv daws, hnub no lub Moo Zoo hais tias Huab Tais Yes Xus hais rau cov thwj tim tias nws yuav mus cuag Leej Txiv Tswv Ntuj, yuav tsis nrog lawv nyob ntxiv, yog li mas cov thwj tim tsum xyaum ua neej nyob nrog qab ntuj neeg nyob hauv lawv txoj kev ntseeg. Lawv yuav tsis plam rau ntiaj teb zaj tswv yim yog lawv vam txog Leej Ntuj Plig ua tus nplij lawv.
Leej Ntuj Plig mas peb muab piv rau dab tsi thiaj yuav to taub zoo, yam li yog Huab Tais Yes Xus txoj pa. Tus Hauv Paus Xa Lus Zam hais tias thaum Huab Tais Yes Xus txoj sia tu mas nws nyo taub hau ces nws tus plig tawm mus, thaum Huab Tais Yes Xus sawv rov los, nws tshuab pa pub Leej Ntuj Plig rau cov thwj tim, ces lawv lub siab loj tuaj thiab lawv muaj cuab kav tawm mus tshaj lub Moo Zoo.
Huab Tais Yes Xus hais tias “Leej Nplij Neeg yuav ua kom qab ntuj neeg pom tias lawv ua txhaum, ua tsis ncaj, thiab txiav txim yuam kev.” Yog Leej Ntuj Plig yuav qhib lub tswv yim rau sawv daws pom tias txhaum yog dab tsi, qhov ncaj thiab tsis ncaj yog li cas, kev txiav txim ne ho yog mus raws li cas tiag.
Yog li mas cov neeg vam txog Leej Ntuj Plig mas lawv tsis yuam kev. Li ntawd, peb sawv daws thiaj yuav thov Leej Ntuj Plig tsis tseg kom niaj hnub nws kaj peb siab thiab tsom kev rau peb taug.
Kwv tij, tus ntseeg thiab ua raws li Huab Tais Yes Xus cov lus qhia, tus ntawd tsis raug txim. Tus twg tsis yuav Huab Tais Yes Xus thiab tsis mloog Huab Tais Yes Xus hais, tus ntawd yuav raug txim.
Hnub no, Leej Ntuj Plig nyob saum peb, tos peb qhib siab rau Leej Ntuj Plig los tsa tsev hauv peb, los coj peb kom txhob poob rau hauv qhov txhaum, los hlawv peb kom kub lug nyob hauv Tswv Ntuj kev nyiam mas peb thiaj xav thaum kev nyiam mus pub rau lwm tus.
Nyob zoo.
