ZAJ NYEEM HNUB TIM 27 LUB 3 HLIS 2024
HNUB PLAUB LUB LIS PIAM NTSHIAB
COV LUS NYOB HAUV MAS TAIS NTAWV MOO ZOO (MT 26: 14-25)
Kwv tij Hmoob sawv daws, lub Moo Zoo hnub no rov piav txog hmo uas Huab Tais Yes Xus nrog cov thwj tim noj pluas mov kawg zoo xws li zaj peb tau hnov nyob hauv nag hmo, tab sis yog cov lus tus Hauv Paus Xa Lus Mas Tais sau nyob hauv nws phau ntawv Moo Zoo. Mas Tais piav tias thaum lawv noj mov, Huab Tais Yes Xus hais rau lawv tias “Nyob hauv nej 12 tug no, muaj ib tug yuav muab kuv muag.” Ces tas sawv daws ntxhov siab, lawv nug tias yog leej twg, nyias tos nyias ntshai tsam tus ntawd lam yog kuv. Huab Tais Yes Xus tsis qhia tias yog leej twg, nws tsuas hais tias “Yog tus tau nrog kuv cev tes ntsw hauv lub phaj.”
Kwv tij Hmoob, raws cov Yus Das ib txwm coj, mas yog lawv xav ntaus phooj ywg nrog tus neeg twg, lawv yuav cev tais phaj rau tus neeg ntawd nrog lawv koom noj ua ke, yog li mas thaum Huab Tais Yes Xus cev lub phaj rau Yus Das ntsw mas thiaj txhais tau tias txawm Huab Tais Yes Xus paub tias Yus Das yuav muab nws muag, tsis kav nws tseem nyiam Yus Das li qhov qub. Huab Tais Yes Xus tsis muab txim rau nws, tab sis yogxav pab nws. Yus Das paub tias Huab Tais Yes Xus paub lawm tias nws yuav ntxeev siab muab Huab Tais Yes Xus muag, tsis kav nws tsis kag thim siab, nws tseem yuav ua raws li nws lub siab ntshaw thiab, ces qhov kawg Yus Das thiaj tawm mus.
Kwv tij, nyob hauv pluas mov no, yog Huab Tais Yes Xus tau tsim lub Cim Yug, yog lub Cim rov haum xeeb nrog Huab Tais Yes Xus dua, rov coj peb mus khaub zig Tswv Ntuj. Niaj hnub no yog nyob hauv lub Txoos Teev Ntuj. Yog li mas kwv tij Hmoob sawv daws, thaum peb txais Yes Xus lub Cev nyob hauv lub Cim Yug thiaj yog peb zoo siab xav nrog sib haum xeeb nrog Huab Tais Yes Xus, xav kom Huab Tais Yes Xus los hloov peb lub siab lub tswv yim, kom peb tso tseg txoj kev phem tig los nyob hauv kev zoo.
Kwv tij, peb yuav thov Huab Tais Yes Xus pab hloov peb lub siab qhias siab phem no, thov Huab Tais Yes Xus hnav lub siab tshiab yog siab muag siab mos rau peb, yog lub siab nyiam Ntuj thiab nyiam neeg mog.
Nyob zoo sawv daws.
