ZAJ NYEEM HNUB TIM 26 LUB 8 HLI 2024
HNUB OB LUB LIS PIAM 21 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 23: 13, 15-22)
Kwv tij Hmoob sawv daws, nyob hauv lub Moo Zoo hnub no nej hnov hais txog cov ‘Kws Ntawv Ntshiab’ thiab cov ‘Fas Lis Xais’. Huab Tais Yes Xus tsawm 2 pab neeg no tias lawv tau txoj hmoov phem!
Nyob hauv cov Yus Das txoj cai mas lawv faib tsoom pej xeem ua ntau txheej neeg, los yog ntau pab pawg.
Cov Kws Ntawv Ntshiab yog cov neeg kawm cov txuj hauv cov Yus Das phau Ntawv Ntshiab; yog cov zaj hauv Ntawv Cog Lus Qub. Lawv cov no mas paub Txoj Cai zoo, ces lawv ua Xib Hwb qhia Txoj Cai rau tsoom sid nyob hauv cov tsev txoos los ntawm tej tog kev.
Cov Fas Lis Xais yog cov neeg txheej siab coj rawv Mais Xes Txoj Cai nruj, lawv ua hau tswj tsoom pej xeem Yus Das.
Cov Kws Ntawv Ntshiab thiab cov Fas Lis Xais thiaj yog txheej neeg paub Txoj Cai zoo, ces lawv xav yuam tsoom pej xeem kom coj xws li lawv mas tas tsoom Yus Das thiaj yuav yog Tswv Ntuj haiv neeg ntshiab.
Yog muab saib mas lawv yeej ua ib tug neeg ntseeg txog Tswv Ntuj zoo kawg, tab sis ua cas Huab Tais Yes Xus tsawm tias lawv txoj hmoov phem?
Vim lawv paub ntau dhau, ces lawv nthuav Txoj Cai raws li lawv lub siab ntshaw, lawv tsis nco faj tias qhov tseeb Txoj Cai lub ntsiab yog dab tsi. Lawv qhia luag tej ua ib yam li lawv xav, tab sis lawv tsis ua li lawv cov lus qhia. Lawv muab Txoj Cai ua tej daim ntxhoo coj kom pab ntuas lawv siab, lawv sau cov Txoj Cai cia rau ntawm tej qhov rooj kom pab lawv lub tswv yim nco tau, tab sis lawv tsis paub ntxeev Txoj Cai kom xis Tswv Ntuj siab.
Thaum lawv ua thiab coj li no, lawv tseem txhib sawv daws kom ua thiab coj li lawv, ces zoo li lawv yog neeg dig muag coj ib pab neeg dig muag mus poob qhov ntuj.
Kwv tij Hmoob, peb rov tig los saib hauv peb lub neej saib puas muaj zoo li ntawd. Tshwj xeeb mas yog hauv peb pawg ntseeg, los yog ntawm peb ntiag tug kiag, mas peb puas ua thiab coj li cov lus hais los no.
Peb puas ua ib tug neeg zoo nraum daim tawv, peb puas yog ib tug neeg hais li no tab sis ua li tod, peb puas yog ib tug neeg nyiam nyiam hais txog Tswv Ntuj Lo Lus los ntuas lwm tus tab sis yus tsis ua li cov lus yus hais rau luag, peb puas yog ib tug neeg paub Ntuj kev cai zoo tab sis tseem vam txog kev saib hmoov saib yaig vam txog lwm txoj kev teev hawm, los peb puas yog ib tug paub Huab Tais Yes Xus cov lus qhia zoo tab sis tseem muaj lub siab nqaim tsis nyiam tsis hlub lwm tus, peb puas yog tus neeg dig muag coj kev.
Peb yuav thov Huab Tais Leej Ntuj Plig tuaj ua lub teeb tsom kev rau peb lub tswv yim ko to taub Tswv Ntuj lub siab nyiam.
