ZAJ NYEEM HNUB TIM 26 LUB 4 HLIS, HNUB RAU LUB LIS PIAM 4 CAIJ HLA
COV LUS NYOB HAUV ZAM NTAWV MOO ZOO (Z 14: 1-6)
Kwv tij Hmoob sawv daws, peb yug los ua neeg yog kom tau ua dab tsi, thiab thaum peb txoj sia tu lawm, peb yuav mus qhov twg?
Cov lus nug no mas yog cov lus ntiaj teb neeg tiam dhau tiam yeej ib txwm xav txog, tsis hais peb tiam no los yog cov tiam txheej thaud. Yog li Huab Tais Yes Xus thiaj hais cov lus nej tau hnov hauv Ntawv Moo Zoo hnub no rau cov thwj tim. Huab Tais Yes Xus hais tias nej yog kuv cov thwj tim ces thaum nej tus plig tso nej lub cev lawm, mas nej yuav mus nrog kuv nyob saum Ntuj Ceeb Tsheej.
Tab sis cov thwj tim tsis to taub, ces Huab Tais Yes Xus thiaj hais ntxiv tias ‘Kuv yog txoj kev, yog qhov tseeb, thiab yog txoj sia.’
Kwv tij Hmoob, yog peb yuav mus tom teb tab sis tsis muaj txoj kev ces ntshai kawg yuav tau maub hav zoov hav tsuag mus xwb, thaum mus txog mas peb ib ce yuav raug pos khawb raug ceg khaub kos txaij zias tas thiab ntshai peb yuav yuam kev siv sij hawm ntev mam mus txog, kev mus cuag Tswv Ntuj kuj zoo li ntawd. Mas Huab Tais Yes Xus thiaj yeem ua txoj kev rau peb taug kom mus txog yooj yim thiab txhob yuam kev.
Kwv tij Hmoob, Huab Tais Yes Xus tuag thiab sawv rov los, nws yog tseem Tswv Ntuj thiab tseem tib neeg, qhov no yog qhov tseeb ntawm Huab Tais Yes Xus. Yog peb ntseeg qhov tseeb no ces muaj ib hnub peb kuj yuav sawv rov los xws li Huab Tais Yes Xus thiab yuav muaj txoj sia nyob mus li vim Huab Tais Yes Xus yog txoj sia.
Li ntawd mas kwv tij Hmoob, peb yuav txais Huab Tais Yes Xus los ua peb txoj kev thiab ua peb txoj sia mas peb thiaj yuav tau mus nrog nws nyob pem Ntuj Ceeb Tsheej raws li nws hais tseg mog.
