ZAJ NYEEM HNUB TIM 26 LUB 3 HLIS 2024
HNUB PEB LUB LIS PIAM NTSHIAB
COV LUS NYOB HAUV ZAM NTAWV MOO ZOO (ZM 13: 21-33, 36-38)
Cov Hmoob sawv daws, Moo Zoo hnub no yog piav txog thaum Huab Tais Yes Xus lawv noj pluas hmo kawg nyob hauv Hnub Tsib ua ntej yuav txog lub ntees Hla. Thaum Huab Tais Yes Xus ntxuav cov thwj tim ko taw tas, Huab Tais Yes Xus thiaj qhia rau lawv tias yuav muaj ib tug nyob hauv lawv ntxeev siab rau nws, thiab Huab Tais Yes Xus kuj hais rau Pob Zeb tias Pob Zeb yuav tsis lees paub Huab Tais Yes Xus. Huab Tais Yes Xus tseem hais ntxiv tias nws yuav ncaim lawv mus rau ib qhov chaws uas lawv yuav raws nws mus tsis tau.
Kwv tij, Huab Tais Yes Xus paub tias thaum nws hais tej lo lus ntawd rau cov thwj tim ua rau lawv ntxhov siab, tab sis Huab Tais Yes Xus kuj hais ib lo lus txhawb siab rau lawv tias “Qhov chaw kuv mus mas nyem no nej lawv kuv qab tsis tau; tab sis yav tom ntej, nej yuav lawv kuv qab tuaj tau.”
Kwv tij, lo lus no kuj yog ib lo lus Huab Tais Yes Xus hais rau peb nyob hauv hnub no. peb sawv daws thaum peb txais lub Cim Ntxuav mas peb yog Huab Tais Yes Xus cov thwj tim tiag, ces peb yog cov yuav raws Huab Tais Yes Xus qab mus. Tab sis yog niaj hnub peb tsis ua xws li yog ib tug thwj tim, mas peb yuav raws Huab Tais Yes Xus mus tsis tau. Yog peb ntxeev siab rau Huab Tais Yes Xus, peb tsis kam lees Huab Tais Yes Xus los ua peb tus Huab Tais mas peb yuav mus tsis tau hauv qhov chaw Huab Tais Yes Xus mus.
Peb yog me nyuam neeg, peb muaj txhaum, peb lub zog me me xwb, mas peb yuav thov Tswv Ntuj pub nws lub tswv yim yog Leej Ntuj Plig Ntshiab tuaj nyob hauv peb, pub nws lub zog loj zog nchav tuaj pab peb, kom peb ua tiag nyiaj taus dab phem txoj kev haub ntxias, kom peb to taub txog Huab Tais Yes Xus cov lus, mas peb thiaj yuav txawj nyiam Huab Tais Yes Xus thiab nyiam lwm tus, ces peb thiaj yuav kub siab ua peb txoj hauj lwm Tswv Ntuj muab rau peb ua nyob hauv lub qab ntuj no.
Nyob zoo sawv daws.
