HNUB TIM 26 LUB 11 HLIS; HNUB PEB LUB LIS PIAM 34 CAIJ NYOB NRUAB XYOO
COV LUS NYOB HAUV LUS KAS NTAWV MOO ZOO (LK 21: 5-11)
Kwv tij Hmoob, Huab Tais Yes Xus hais tias ua ntej yuav txog lub caij kawg, mas yuav muaj ntau yam xwv txheej tuaj raug lub ntiaj teb; yam li yuav muaj tsov rog, muaj kev mob nkeeg, muaj kev tshaib plab loj. Txhua yam xwv txheej no yuav ua kev txaus ntshai rau lub ntiaj teb, tab sis kom peb cov neeg ntseeg txhob ntaus siab me, txhob muab tej yam xwm phem no los siab ua qhov loj, ces zoo li peb rov hem peb.
Qhov peb yuav xub muab siab rau mas yog ‘npaj’ kom txhij tos lub caij tej xwm ntawd tuaj txog peb. Huab Tais Yes Xus hais tias ‘Nej txhob ntshai.”
Huab Tais Yes Xus kuj ntuas cov thwj tim tias yuav muaj ib cov neeg sawv los ntxias sawv daws kom yuam kev, lawv yuav hais tias lawv yog Yes Xus, lawv yog tus Tswv Ntuj xa los cawm sawv daws. Huab Tais Yes Xus tsuas xeeb ua neeg tib lwm xwb, nws yuav tsis los nyob hauv neeg lub cev nqaij ntxiv lawm. Huab Tais Yes Xus yuav los mas yog lub caij kawg xwb. Li ntawd, cov thwj tim yuav tau ceev faj.
Kwv tij Hmoob, peb muab saib rau lub zim txwv peb nyob no, peb pom muaj ntau tus neeg sawv los ua saub; tej tus hais tias lawv yog Yes Xus, los lawv hais tias Yes Xus thawj lawv kom ua saub. Tej tus tsis hais tias lawv yog Huab Tais Yes Xus, tab sis lawv hais tias Huab Tais Tswv Ntuj hu lawv los qhia cov lus cawm sawv daws.
Yog peb tsis ceev faj thiab xyuam xim thiag, mas peb yeej yuav yuam kev xwb xwb.
Lawv hais lus tau yog tshaj, lawv hais lus taug muaj ceem kawg, lawv hais tsis yuam kev ib qho li, lawv tseem hais tau zoo dua Huab Tais Yes Xus cov tseem thwj tim lawm thiab.
Kwv tij Hmoob, yog yeej yuav muaj tej yam zoo li Huab Tais Yes Xus hais ntawd, mas Huab Tais Yes Xus thiaj tsa kom muaj lub Koom Txoos, kom muaj tus Vaj Qhia, cov Tswv Qhia; kom lawv ua tus coj thiab qhia kev rau sawv daws taug, mas tsoom neeg ntseeg thiaj tsis yuam kev. Li ntawd mas kwv tij Hmoob, thaum peb ntsib los hnov tej yam ua rau peb lub siab pib ua xyem xyav, mas peb thiaj yuav vam txog lub Koom Txoos cov lus qhia, vam txog cov Leej Choj pab peb, kom peb pom tias tej xwm peb hnov ntawd puas yuav coj peb mus yuam kev los tsis yuam. Nyob zoo sawv daws.
