ZAJ NYEEM HNUB TIM 25 LUB 7 HLI 2025
HNUB UA HMOOV LEEJ NTSHIAB YA SKOS
COV LUS NYOB HAUV MAS TAIS NTAWV MOO ZOO (MT 20: 20-28)
Kwv tij Hmoob sawv daws, hnub no lub Koom Txoos yuav ua hmoov cav txog Leej Ntshiab Yas Kos uas yog Ntxes Npes Dais thiab Xas Los Mes tus tub, nws yog Zam tus tij laug. Lub Koom Txoos tau xaiv cov lus hauv Mas Tais Ntawv Moo Zoo, zaj hais txog thaum niam Ntxes Npes Dais thov Huab Tais Yes Xus tsa Yas Kos thiab Zam ua tus loj nyob ntawm Huab Tais Yes Xus sab xis thiab sab laug.
Kwv tij, ua ntej yuav los twm txog Huab Tais Yes Xus cov lus hauv lub Moo Zoo, peb los paub txog Leej Ntshiab Yas Kos me ntsis tso.
Leej Ntshiab Yas Kos yog tus ntxuav plig Zam ib tug thwj tim, tab sis tom qab nws tau nrog Huab Tais Yes Xus tham tas, nws thiaj tig los ua Huab Tais Yes Xus thwj tim. Yas Kos raws nraim Huab Tais Yes Xus tsis ua xyem xyav, mas Huab Tais Yes Xus yuav mus qhov twg, thiaj nyiam coj Yas Kos, Pob Zeb thiab Zam nrog nws mus; xws li thaum Huab Tais Yes Xus nce mus ntsib Es Lias thiab Mais Xes saum roob, thaum Huab Tais Yes Xus mus tsa Yais Los tus ntxhais, thaum Huab Tais Yes Xus mus teev Ntuj nyob hauv hmo kawg.
Tom qab Huab Tais Yes Xus mus saum ntuj lawm, Yas Kos tau mus tshaj lub Moo Zoo txog Xyis Pas Yas teb, ces xyoo 40 nws rov qab los Yes Lus Xas Les. Yas Kos ua tus saib cov thwj tim nyob Yes Lus Xas Les, tus vaj Hes Los thiaj ntes Yas Kos mus txiav caj dab tuag ua tim khawv nyob hauv xyoo 44. Yas Kos lub taub hau mas cov thwj tim muab faus nyob Yes Lus Xas Les, tab sis nws lub cev raug xa mus faus nyob Xyis Pas Yas.
Kwv tij, peb rov los saib lub Moo Zoo hauv hnub no.
Thaum Huab Tais Yes Xus lawv nce mus pem Yes Lus Xas Les, cov thwj tim xav tias lawv mus zaum no, mas Huab Tais Yes Xus yuav ua hwj huam ntiab cov Los Mas tawm hauv lub teb chaws mus, ces tas tsoom Yus Das yuav tsa Huab Tais Yes Xus ua tus vaj His Xas Lais. Yog Huab Tais Yes Xus ua vaj, mas lawv 12 leeg yuav tau txais koob meej, ces lawv yuav tau ua 12 tus nom kav 12 xeem His Xas Lais. Tab sis tus twg hauv lawv yuav tau ua tus nyob sab xis thiab xab laug ntawm Huab Tais Yes Xus lub theej kiab.
Muaj ib hnub niam Ntxes Npes Dais thiaj los hais rau Huab Tais Yes Xus, thov kom cia nws ob tug tub; Yas Kos thiab Zam tau ua ob tug nyob ntawm Huab Tais Yes Xus sab xis thiab sab laug. Niam Ntxes Npes Dais cov lus no ua rau cov thwj tim muaj lus tsis zoo siab.
Ntawm Huab Tais Yes Xus, nws pom tias cov thwj tim lawv nkag siab yuam kev loj kawg txog nws, thiab lawv tsis to taub nws kiag li, ces Huab Tais Yes Xus teb tias “Nej tsis paub qhov nej thov.”
Huab Tais Yes Xus siv lub caij nyoog ntawd qhia cov thwj tim txog kev ua tus loj tias “Nyob hauv nej, nej txhob coj li cov thawj tswj tsoom pej xeem. Yog nej xav ua tus loj, mas nej yuav tau ua tus tub txib los tus qhev, li kuv tau tsob hwb thiab tau txhiv sawv daws.”
Kwv tij, ntiaj teb neeg cov thawj coj, lawv coj sawv daws mas lawv siv hwj chim los yuam sawv daws thiab kav sawv daws kom ua raws li lawv pom zoo cia ua; lawv ua tus tswj sawv daws. Tab sis Huab Tais Yes Xus cov thwj tim yuav tsis ua li ntawd, lawv yuav ua sawv daws tus tub txib, lawv yuav ua cov hauj lwm tsob hwb sawv daws nyob hauv txoj kev nyiam ib yam li Huab Tais Yes Xus tau ua tus qauv tseg.
Huab Tais Yes Xus yog Tswv Ntuj Tswv Teb, yog tus kav lub sim ceeb, tsim nyog ntiaj teb neeg yuav tsob hwb nws; tab sis qhov Huab Tais Yes Xus ua mas yog nws yeem ua tus neeg me, nws yeem muab tas nws los ua nqe txhiv sawv daws.
Yog li mas kwv tij Hmoob, hnub no Huab Tais Yes Xus lo lus no thiaj yog ntuas peb sawv daws kom peb xyaum ua tus neeg me tsob hwb lwm tus, qee yus txoj sia los ua cov hauj lwm sis nyiam sis hlub, thiab txhob tsa yus siab dua luag tej.
