ZAJ NYEEM HNUB TIM 25 LUB 3 HLIS 2024
HNUB OB LUB LIS PIAM NTSHIAB
COV LUS NYOB HAUV ZAM NTAWV MOO ZOO (ZM 12: 1-11)
Kwv tij Hmoob sawv daws, lub Moo Zoo hnub no yog piav txog Hnub Ob hauv lub lis piam ua ntej cov Yus Das yuav ua lub ntees Hla. Muab piv ces yog ncaj rau hnub no ntag. Huab Tais Yes Xus tuaj txog lub zos Npes Tas Nias, mas tsoom pej xeem ua ib rooj qav tos nws. Muaj Las Ntxas Los, Mas Tas thiab Mab Liab tuaj koom rooj qav ntawd thiab. Leej Ntshiab Zam sau piav nyob hauv nws phau ntawv Moo Zoo tias Mab Liab tsis nrog cov poj niam rau mov, tab sis yam Mab Liab ua mas yog nws los zaum ze ntawm Huab Tais Yes Xus ko taw, ces nws muab tshuaj tsw qab pleev Huab Tais Yes Xus taw thiab muab nws cov plaub hau los so.
Kwv tij, lub Moo Zoo piav ntxiv tias Huab Tais Yes Xus hais rau Yus Das tias cia Mab Liab pleev tshuaj tsw qab rau Yes Xus taw twj ywm li ntawd. Huab Tais Yes Xus kuj hais tias Mab Liab ua li ntawd yog ib qhia tias nws yuav xub ua qhov kab ke pleev tshuaj thiab qhwv Yes Xus lub cev ua ntej yuav coj mus zwm ntxa.
Kwv tij Hmoob, yog nej nyiam nyeem cov Ntawv Moo Zoo mas nej yuav paub tias Huab Tais Yes Xus tuag yog Hnub Rau yav 3 teev, ces txog thaum lawv muab Huab Tais Yes Xus lub cev txo saum tus Ntoo Cuam los mas twb pib tsaus ntuj yog yuav hla mus rau Hnub Xya los yog cov Yus Das hnub caiv lawm. Raws cov Yus Das txoj cai mas Hnub Xya lawv yuav caiv tsis pub ua ib yam hauj lwm dab tsi li, ces Huab Tais Yes Xus cov swm neeg thiaj ua kab ke pam tuag rau Huab Tais Yes Xus tsis tau, lawv yuav pleev tshuaj rau Yes Xus lub cev los kuj tsis tau, ces lawv thiaj muab ntaub qhwv Yes Xus lub cev zoo zoo coj mus cia hauv lub qhov ntxa xwb. Lawv yuav tos kom dhau hnub caiv mas lawv thiaj mam tuaj pleev tshuaj thiab ua ntees pam tuag rau Huab Tais Yes Xus.
Huab Tais Yes Xus paub tias txog hnub ntawd, mas Mab Liab thiab cov poj niam yuav tuaj ua kab ke pleev tshuaj rau nws tsis tau lawm, vim nws twb sawv rov los lawm. Yog vim qhov ntawd, Huab Tais Yes Xus thiaj tsis txwv Mab Liab pleev tshuaj tsw qab rau nws.
Huab Tais Yes Xus paub tias nws yuav tsis nrog lawv nyob mus li, ces Huab Tais Yes Xus thiaj ntuas cov thwj tim tias “Nej muaj cov pluag nrog nej nyob mus li, tab sis nej tsis muaj kuv nrog nej nyob mus li.”
Kwv tij, txawm tias niaj hnub no Huab Tais Yes Xus lub cev tsis nrog peb nyob, los thov kom peb niaj hnub ua zoo rau cov neeg pluag, vim Huab Tais Yes Xus tau hais tias “Kuv hais tseeb rau nej; nej tau ua npaum li cas rau cov me tshaj hauv kuv tsoom kwv, mas yog nej ua rau kuv.” (MT 25: 40)
Peb ua li ntawd, mas Huab Tais Yes Xus thiaj yuav nrog peb nyob mus li.
Nyob zoo sawv daws.
