ZAJ NYEEM HNUB TIM 24 LUB 7 HLI 2025
HNUB TSIB, LIS PIAM 16 CAIJ NYOB NRUAB XYOO
COV LUS NYOB HAUV MAS TAIS NTAWV MOO ZOO (MT 13: 10-17)
Kwv tij Hmoob, thaum Huab Tais Yes Xus hais tej zaj lus tseem ceeb, mas nws ua paj lug hais. Cov paj lug ntawd tsis yog ib yam nyob deb ntawm cov Yus Das lub neej, yog tej zaj cov Yus Das ib txwm pom los yog lawv kev ua neej kiag. Tej zaj lawv hnov kiag mas lawv to taub tam sid, tej zaj lawv hnov mas lawv yuav tau coj mus ua tib zoo xav tso mam to taub. Hnub no, thaum Huab Tais Yes Xus hais txog zaj paj lug tus tseb nplej, mas cov thwj tim thiaj hais tias ua cas nws tsis hais qhia ncaj kiag rau sawv daws, vim tias yog Huab Tais Yes Xus hais ua paj lug mas sawv daws yuav tsis to taub lub ntsiab zoo.
Muaj tseeb li cov thwj tim hais tiag! Peb cov laus neeg thaum lawv yuav ntuas peb los yog hais ib lo lus tseem ceeb muaj qab hau rau sawv daws, mas lawv nyiam ua paj lug hais. Peb cov mloog ib txhia kuj to taub, ib txhia kuj tsis to taub.
Tus yuav to taub zoo, mas yog tus muab siab mloog, qhib siab txais lo lus ntawd, nws khaws cov paj lug coj mus xav mas nws thiaj yuav to taub. Tus neeg muaj pob ntseg tab sis nws tsis muab siab rau mloog, mas nws zoo li tus lag ntseg, nws yuav tsis tau dab tsi li.
Peb hnov Huab Tais Yes Xus hais rau cov thwj tim tias “Vim Ntuj pub kom nej paub tej yam tob hauv Ntuj lub Ceeb Tsheej, tab sis Ntuj tsis tau pub rau cov ntawd. Vim li ntawd, kuv thiaj ua paj lug hais rau lawv.”
Kwv tij Hmoob, Ntuj tsuas pub kom cov muab siab rau mloog thiab qhib siab txais xwb, lawv thiaj yuav to taub txog Ntuj lub Ceeb Tsheej. Tus twg lam mloog, los yog nws tsis muaj lub siab ntseeg, nws tsis kam txais Huab Tais Yes Xus cov lus, mas nws yuav tsis nkag siab thiab to taub txog Huab Tais Yes Xus cov lus ib zaug.
Nyob hauv peb kev ua neej nyob los kuj zoo li ntawd, yog cov laus ntuas koj tab sis koj tsis qauv ntsej mloog, mas lawv hais npaum cas los koj yeej khaws tsis tau. Zoo li cov me nyuam mus kawm ntawv, yog tus xib hwb qhia tej yam tus me nyuam tsis nyiam, mas tab txawm tus xib hwb qhia zoo npaum cas los tus me nyuam yeej tsis nkag siab.
Nyob hauv txoj kev ntseeg; yog peb tsis muab siab rau thiab tsis kub siab nrhiav mas peb yeej yuav txais tsis tau txoj kev cawm zoo li ntawd.
Cov thwj tim yog cov nrog nraim Huab Tais Yes Xus, lawv muab siab mloog thiab lawv pom txhua yam Huab Tais Yes Xus ua, ces Huab Tais Yes Xus thiaj hais tias “Nej qhov muag tau txoj hmoov zoo, vim nej qhov muag pom kev. Nej pob ntseg tau txoj hmoov zoo, vim nej pob ntseg hnov lus.”
Kwv tij Hmoob sawv daws, Huab Tais Yes Xus lo lus tuaj txog peb txhua tus neeg, nyob ntawm peb saib puas muab siab rau mloog thiab khaws coj mus xav, thiab ua raws. Tsis muaj leej twg yuam thiab kuj tsis muaj leej twg txwv.
