ZAJ NYEEM HNUB TIM 24 LUB 4 HLIS, HNUB NCO TXOG LEEJ NTSHIAB FIS DES LIS
COV LUS NYOB HAUV ZAM NTAWV MOO ZOO (Z 12: 44-50)
Kwv tij Hmoob, Huab Tais Yes Xus hais tias “Leej twg ntseeg txog kuv, mas nws kuj ntseeg txog tus xa kuv tuaj thiab. Leej twg pom kuv, mas nws kuj pom tus xa kuv tuaj thiab.”
Lo lus no yog lo lus zeem tseeb tias yog peb ntseeg txog Leej Txiv Tswv Ntuj mas peb tsum ntseeg txog Huab Tais Yes Xus. Yog peb xav pom Tswv Ntuj mas kom peb ntsia Huab Tais Yes Xus. Vim Tswv Ntuj muaj koob meej thiab yog tus ntshiab mas neeg thiaj pom tsis tau Tswv Ntuj thiab hnov tsis tau Tswv Ntuj lub suab, ces Tswv Ntuj thiaj tso Huab Tais Leej Tub nqes los xeeb lub cev ua neeg nyob rau ntiaj teb no, kom nws zoo li neeg thiab hais lus li neeg, mas neeg thiaj mloog tau thiab pom tau Tswv Ntuj.
Huab Tais Tswv Ntuj yog qhov pom kev, Huab Tais Yes Xus yog Tswv Ntuj, mas Huab Tais Yes Xus thiaj yog qhov pom kev. Thaum peb txais lub Cim Ntxuav mas peb tau koom nyob hauv Huab Tais Yes Xus lub cev, ces peb thiaj yog qhov pom kev ci rau lub ntiaj teb. Tab sis yog peb tsis ua raws li Huab Tais Yes Xus cov lus, mas zoo li peb yog lub teeb tsis muaj roj, ces peb qhov pom kev yuav maj mam qaus mus. Thaum kawg peb txia ua lub teeb tsaus ntuj nti, tsis zoo yuav ntxiv.
Li ntawd, thiaj tsis yog Tswv Ntuj txiav txim rau peb, tab sis yog peb rov qab txiav txim rau peb xwb.
Yog li mas kwv tij Hmoob sawv daws, niaj hnub no peb thiaj yuav nrhiav roj los ntim rau peb lub teeb kom peb lub teeb ci ntsa mus li. Peb nrhiav kom tau ua raws Huab Tais Yes Xus lo lus, mas peb lub neej thiaj yuav ci ntsa tsom kev rau lwm tus mog.
