ZAJ NYEEM HNUB TIM 24 LUB 3 HLIS 2025
Hnub Ob, Lis Piam 3 caij Plaub Caug.
LK 4: 24-30
Kwv tij Hmoob, hnub no lub Moo Zoo piav txog thaum Huab Tais Yes Xus rov mus txog Nas Xas Les, lawv kom nws mus nyeem thiab nthuav Tswv Ntuj Lo Lus rau lub txoos mloog. Huab Tais Yes Xus xaiv tau tus Yaj Saub cov lus hais txog Tswv Ntuj tus tub txib li no tias “Huab Tais lub tswv yim nyob saum kuv vim nws pleev roj los qee kuv. Huab Tais xa kuv mus tshaj lub Moo Zoo rau cov pluag, xa kuv mus ceeb toom rau cov nyob txim tias lawv yuav dim, rau cov dig muag tias lawv yuav rov pom kev, rau cov raug luag yuam tias yog xyoo Huab Tais yuav pub txiaj ntsim”, ces Huab Tais Yes Xus nthuav tias “Hnub no cov lus nyob hauv zaj ntawv no Tsheej xeeb raws li nej tau hnov.” Cov Yus Das puav leej paub tias Yaj Saub His Xais cov lus no hais txog Leej Pleev, ces lawv to taub tam sid tias Huab Tais Yes Xus tab tom hais tias nws yog Leej Pleev. Lawv qhuas cov lus Huab Tais Yes Xus nthuav tab sis lawv ua siab ntseeg tsis tau vim lawv xav tias Leej Pleev tsum yog ib tug noob no noob tswv muaj hwj chim nto moo, tsis yuav yog ib tug neeg txhua rooj txua tog tsis muaj tsim nyob hauv lub zos me me xws li Nas Xas Les. Lawv xav li ntawd mas Huab Tais Yes Xus thiaj hais cov lus hnub no.
Kwv tij, 874 xyoo ua Yes Xus ntej, cov His Xas Lais yuam kev mus teev cov dab Npas Has ces Tswv Ntuj xa Es Lias mus ceeb toom kom lawv rov los taug Tswv Ntuj txoj kev tab sis lawv tsis mloog, Tswv Ntuj thiaj pub kom lub teb chaws raug xwv txheej ntuj qhuav tau 3 xyoos ntau. Tswv Ntuj hlub ib tug poj ntsuam pej kum neeg ntseeg txog Tswv Ntuj zoo, Tswv Ntuj thiaj xa Es Lias mus cawm tus poj ntsuam ntawd. News nkaum tawm xyoo tom qab, Tswv Ntuj kuj kom Es Lis Xais pab tus vaj Xis Lias tus thawj tub rog Nas Maas kom lub cev rov huv, ces nws tig los ntseeg txog Tswv Ntuj.
Huab Tais Yes Xus hais txog cov xwm ntawd, vim nws xav qhia rau cov Nas Xas Les tias yog lawv tsis ntseeg tias nws yog Leej Pleev mas lawv tsis tau txais kev cawm.
Kwv tij, hnub no lub Moo Zoo qhia qhov tseeb rau peb tias peb puas ntseeg tias Huab Tais Yes Xus yog Leej Pleev tiag, peb puas lees cia Huab Tais Yes Xus ua peb tus tseem Huab Tais. Lub caij Plaub Caug no yog lub caij zoo rau peb rov los xav txog peb lub siab ntseeg saib peb puas ntseeg tiag: yog peb ntseeg tiag mas peb tsum mloog thiab ua raws li Huab Tais Yes Xus cov lus qhia. Nyob zoo.
