ZAJ NYEEM HNUB TIM 23 LUB 8 HLI 2024
HNUB NCO TXOG LEEJ NTSHIAB LOS XAS NYOB LIS MAS
COV LUS NYOB HAUV MAS TAIS NTAWV MOO ZOO (MT 22: 34-40)
Kwv tij Hmoob sawv daws, hnub no nej hnov Huab Tais Yes Xus hais meej kawg tias tas nrho cov txoj cai mas dai ncuv rau 2 lo lus qhia no; yam li ‘Koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj. Koj yuav nyiam tus nyob ze koj ib yam nkaus li koj nyiam koj’.
2 lo lus qhia no kuj yog 2 lo lus peb cov neeg ntseeg txog Yes Xus yuav khaws coj mus ua raws.
Kwv tij, peb cov neeg ntseeg coob leej hais tias lawv nyiam Huab Tais Tswv Ntuj tab sis lawv muab siab dai ncuv rau lwm yam; xws li nyiaj txiag, hauj lwm, lub xov tooj, dej caw, kev ua si; mas lawv puas yog nyiam Huab Tais Tswv Ntuj tiag. Lawv hais tias lawv nyiam Huab Tais Tswv Ntuj, tab sis lawv tsis qab siab thov Ntuj, tsis kub siab mus koom lub Txoos Txi Ntuj; mas puas yog lawv nyiam Huab Tais Tswv Ntuj tiag. Lawv hais tias lawv nyiam Huab Tais Tswv Ntuj, tab sis thaum lawv muaj mob los yog ntxhov siab, lawv tseem mus saib hmoov saib yaig, lawv tseem mus rau luag tej ua khawv koob; mas lawv puas nyiam Huab Tais Tswv Ntuj tiag.
Hais txog ‘koj yuav nyiam tus nyob ze koj ib yam nkaus li koj nyiam koj’, mas leej twg yog tus nyob ze peb. Puas yog peb niam peb txiv? Puas yog peb tsev neeg? Puas yog peb cov kwv tij? Puas yog peb cov phooj ywg? Los puas yog peb cov yeeb ncuab?
Tus nyob ze peb yog txhua tus neeg nyob hauv lub qab ntuj no, tsis hais tus peb ntsib nyob hauv peb lub neej, los tus peb tsis tau pom dua ib zaug.
Peb nyiam peb zoo li cas mas peb kuj yuav nyiam sawv daws zoo li ntawd.
Muab hais mas ntshai yog ib yam to taub tsis yooj yim. Tab sis muab piv li thaum lub Koom Txoos, los tus Txiv Plig hais kom peb pab thov Ntuj rau tus neeg mob, mas peb puas thov. Thaum muaj ib tug neeg tso lub ntiaj teb no tseg, peb puas sib sau mus thov Ntuj rau nws. Thaum peb hnov lub moo tias muaj tej tus neeg ntsib xwv txheej txom nyem mas peb puas pab tus neeg ntawd. Peb pom tej tus neeg tsis muaj xws li peb, mas peb puas yuav pub yam peb muaj rau nws.
Kwv tij Hmoob sawv daws, tsis yooj yim kiag li, tab sis peb yuav thov Tswv Ntuj pab thiab xyaum hloov peb lub siab lub tswv yim kom dai ncuv rau 2 lo lus qhia no mog.
‘Koj yuav muab tas koj lub siab, tas koj tus ntsuj plig, tas koj lub tswv yim los nyiam koj tus Huab Tais Tswv Ntuj. Koj yuav nyiam tus nyob ze koj ib yam nkaus li koj nyiam koj’.
