ZAJ NYEEM HNUB TIM 23 LUB 4 HLIS, HNUB PEB LUB LIS PIAM 4 CAIJ HLA
COV LUS NYOB HAUV ZAM NTAWV MOO ZOO (Z 10: 22-30)
Kwv tij Hmoob, cov Yus Das ua xyem xyav tsis xav ntseeg tias Huab Tais Yes Xus yog Leej Pleev tiag, lawv thiaj taij tas zog kom Huab Tais Yes Xus ua tej yam rau lawv pom. Qhov tseeb mas Huab Tais Yes Xus twb ua rau lawv pom ntau kawg lawm, tab sis vim lawv lub tswv yim qauj, lawv xav tias Leej Pleev tsum yog ib tug vaj coj lawv tiv cov nom Los Mas, coj lawv sawv ntiab cov Los Mas tawm hauv lub teb chaws. Lawv xav tau tus Pleev zoo li ntawd.
Huab Tais Yes Xus hais rau lawv tias tos lawv tsis ntseeg vim lawv tsis yog nws cov yaj.
Hnub no, peb rov tig los ntsia, los tsom hauv peb; saib peb puas yog Huab Tais Yes Xus cov yaj.
Huab Tais Yes Xus hais tias tus twg xav ua nws cov yaj mas tus ntawd yuav tau mloog Huab Tais Yes Xus lub suab thiab raws nraim Huab Tais Yes Xus mus.
Kwv tij Hmoob sawv daws, peb puas mloog Huab Tais Yes Xus lo lus, peb puas raws Huab Tais Yes Xus qab?
Huab Tais Leej Txiv xa nws Leej Tub los txhiv peb sawv daws tiag, Huab Tais Leej Txiv xa Leej Tub los hu peb sawv daws raws nws qab tiag. Tab sis Huab Tais Leej Txiv tsis yuam peb, nws cia peb xaiv tau ywj peb siab tias puas yuav mloog lost sis mloog, puas yuav raws los tsis raws.
Hnub no, nyob ntawm peb sawv daws, saib peb xaiv txoj kev twg.
