ZAJ NYEEM HNUB TIM 23 LUB 2 HLIS 2024
HNUB XYA THAWJ LUB LIS PIAM CAIJ PLAUB CAUG
COV LUS NYOB HAUV MAS TAIS NTAWV MOO ZOO (MT 5: 43-48)
Cov kwv tij Hmoob sawv daws, lub ntiaj teb neeg ib txwm qhia peb tias kom peb nyiam cov neeg nyiam peb, kom peb hlub cov neeg ua zoo rau peb, tus twg yog peb cov yeeb ncaub mas peb txhob ua zoo rau lawv. Tab sis Huab Tais Yes Xus tuaj qhia ib zaj txawv ntiaj teb neeg zaj; Huab Tais Yes Xus tuaj qhia tias Huab Tais Tswv Ntuj yog tsim ib puas tsav yam hauv lub sim ceeb no, tsis hais toj roob hauv pes, xyoob ntoo, tsiaj txhu los leej tib neeg. Huab Tais Tswv Ntuj tsim txhua tsav txhua yam, yog li Huab Tais Tswv Ntuj thiaj yog tus Tswv Ntuj Tswv Teb.
Txhua yam yog Huab Tais Tswv Ntuj tug, nws thiaj nyiam thiab hlub txhua yam nws tau tsim los, txawm tias yam ntawd zoo los phem, mas Huab Tais Tswv Ntuj yeej nyiam sib luag zos.
Huab Tais Tswv Ntuj tsim leej tib neeg, mas nws tsim kom zoo xws me ntsis li nws, Tswv Ntuj pub Tswv Ntuj tus Plig rau neeg, yog li tib neeg thiaj muaj tsim. Tswv Ntuj tseem saib neeg yog Tswv Ntuj me nyuam thiab, yog li mas peb sawv daws ua yog me nyuam neeg thiaj yuav tau yoog raws li Huab Tais Tswv Ntuj tus yog peb Txiv. Peb yuav sis nyiam sis hlub; nyiam tus hlob mus txog tus yau, nyiam tus nyob ze yus mus txog yus tus yeeb ncaub huv tib si, thiab peb kuj yuav nyiam lub sim ceeb no thiab.
Qhov no yog Huab Tais Yes Xus qhia rau cov raws nws qab, ua nws thwj tim.
Yog li no mas peb cov neeg ntseeg sawv daws, txij hnub peb txais Yes Xus los ua peb tus Huab Tais, txais Yes Xus los ua peb tus Xib Hwb, mas peb cov neeg ntseeg yuav ua raws li Huab Tais Yes Xus cov lus qhia. Li ntawd, niaj hnub peb thiaj yuav tau nyiam tus ntxub peb, peb yuav tau thov Tswv Ntuj rau tus tsim txom peb; kom xwv ib hnub twg nws pom txog Huab Tais Tswv Ntuj lub siab hlub nws, ces nws tig los yuav lub siab tshiab, nrog peb tsim kev thaj yeeb rau lub sim ceeb.
Nyob zoo sawv daws.
