ZAJ NYEEM HNUB TIM 23 LUB 12 HLIS: HNUB NCO TXOG LEEJ NTSHIAB ZAM NYOB KES TIS
COV LUS NYOB PHAU NTAWV MAS LAS KIS (MLK 3: 1-4, 23-24)
LUB MOO ZOO RAWS LI LUS KAS (LK 1: 57-66)
Kwv tij Hmoob sawv daws, cov lus nyob hauv tus Yaj Saub Mas Las Kis phau ntawv yog ib cov lus saub hais txog tus yuav xub tuaj ua ntej Leej Pleev yuav tuaj, tus ntawd yog tus Ntxuav Plig Zam.
Lus Kas piav tias Zam yog Ntxas Kas Lias thiab Es Lis Xas Npes tus tub raws li cov lus hauv lub Moo Zoo hnub no.
Lub npe ‘Zam’ txhais tias ‘Huab Tais Ntuj siab zoo’, lub npe ‘Ntxas Kas Lias’ txhais tias ‘Huab Tais Ntuj nco txog’, thiab lub npe ‘Es Lis Xas Npes’ txhais tias ‘Huab Tais Ntuj cog lus’.
Yog muab lawv peb leeg lub npe los sib txuas ua ib lo lus hais mas yuav hais tau tias ‘Huab Tais Ntuj siab zoo, nws nco txog cov lus tau cog cia’.
Kwv tij, Huab Tais Tswv Ntuj lo lus cog cia mas yog lo lus tias muaj ib hnub Tswv Ntuj yuav xa tus Mes Xias tuaj cawm cov His Xas Lais.
Ntxas Kas Lias tsev neeg thiaj yog zoo li ib lo lus Huab Tais Tswv Ntuj xav qhia rau sawv daws tias txog lub caij teem lawm tiag, txog lub caij tus Mes Xias los yog Leej Pleev tuaj lawm vim tias Huab Tais Tswv Ntuj nco txog cov lus tau cog nrog Tswv Ntuj haiv neeg, ces zaum no Tswv Ntuj siab zoo mas nws pub nws Leej Tub rau nws haiv neeg.
Kwv tij, nyob hauv Ntawv Moo Zoo hais tias cov txheej ze piav tes saib Ntxas Kas Lias yuav tis lub npe li cas rau tus me nyuam. Ntxas Kas Lias kom lawv nqa daim txiag los, nws sau tias ‘Zam’ ces tam sim ntawd nws cia li rov hais lus tau.
Tos Ntxas Kas Lias hais tsis taus lus vim tias thaum tus Tshiab nqia nws hauv Kem Tsev Ntshiab tias nws poj niam yuav yug ib tug tub, mas nws ua xyem xyav tsis ntseeg, mas Tswv Ntuj thiaj ua kom nws hais lus tsis tau mus txog hnub tus me nyuam yug.
Zaj no zoo qhia peb kom muab siab mloog Tswv Ntuj lus thiab ua raws li Tswv Ntuj hais, mas peb thiaj yuav hais tau cov lus muaj txiaj ntsim rau lwm tus. Yog peb tsis ua siab nyob ntsiag mloog, mas peb yuav hnov tsis tau Tswv Ntuj lub suab, peb yuav hais Tswv Ntuj cov lus kom muaj txiaj ntsim rau lwm tus tsis tau.
Tsis hais Tswv Ntuj li lus xwb, cov neeg txom nyem, cov neeg quaj ntsuag lub suab nrog ib ncig peb los peb twb tsis hnov; yog tias peb tsis ua zoo mloog. Yog peb txuas nrog lwm tus sib txeeb hais lus, mas peb kuj yuav tsis paub tias lwm tus tab tom hais dab tsi, lawv muaj kev txom nyem li cas nyob nruab siab.
Kwv tij Hmoob, ze lub caij Huab Tais yus los lawm tiag tiag, xav kom peb sawv daws tso tseg kev hais lus, tab sis tig los nyob ntsiag ntsiag mloog saib peb puas hnov Huab Tais Tswv Ntuj tab tom hais rau peb tias “Kuv nco txog cov lus cog nrog koj, kuv siab zoo ces kuv thiaj tuaj nrhiav koj. Koj txais kuv mas!”
