ZAJ NYEEM HNUB TIM 22 LUB 7 HLI 2024
HNUB UA HMOOV LEEJ NTSHIAB MAB LIAB MAS NTAS LAS
COV LUS NYOB HAUV ZAM NTAWV MOO ZOO (Z 20: 1, 11-18)
Kwv tij Hmoob sawv daws, ua ntej no lub Koom Txoos saib Mab Liab Mas Ntas Las thiab Las Ntxas Los tus muam Mab Liab yog tib tug. Tab sis txog xyoo 2021 Vaj Qhia Fas Ntshis Kus tshaj tej lo lus tias Mab Liab Mas Ntas Las thiab Las Ntxas Los tus muam Mab Liab, nkawd nyias muaj nyias. Lub Koom Txoos pom tias Mab Liab Mas Ntas Las tsis yog ib tug poj niam muaj lub siab ntseeg xws li lwm tus poj niam peb paub txog raws li nyob hauv Ntawv Moo Zoo xwb, Mab Liab Mas Ntas Las tseem yog tus xa Huab Tais Yes Xus lo lus mus rau cov Hauv Paus Xa Lus raws lub Moo Zoo hauv hnub no Huab Tais Yes Xus hais rau Mab Liab Mas Ntas Las tias “Koj mus cuag kuv cov kwv tij, koj hais rau lawv tias ‘kuv nce mus cuag kuv txiv thiab nej txiv, mus cuag kuv tus Tswv Ntuj thiab nej tus Tswv Ntuj’.” Yog vim li no lub Koom Txoos saib Mab Liab Mas Ntas Las yog tus Hauv Paus Xa Lus rau cov Hauv Paus Xa Lus. Li ntawd, lub Koom Txoos thiaj tsis yog yuav nco txog xwb, tab sis lub Koom Txoos yuav ua hmoov txog Mab Liab Mas Ntas Las xws li ua hmoov txog cov Hauv Paus Xa Lus. Lub Koom Txoos saib Mab Liab yog ib tug neeg tseem ceeb thiab muaj txoj hmoov zoo. Lub Koom Txoos tsis hais tias poj niam tsis muaj tsim npaum txiv neej, lub Koom Txoos saib sawv daws muaj tsim thiab tseem ceeb tib yam.
Kwv tij, peb ho los hais txog cov lus hauv lub Moo Zoo hnub no. Huab Tais Yes Xus sawv los rau Mab Liab pom, tab sis nws ntxhov siab tas nrho ces nws zeem tsis tau Huab Tais Yes Xus. Huab Tais Yes Xus hu Mab Liab lub npe kom nws feeb, mas Mab Liab mam zeem tau.
Nyob hauv peb kuj zoo li ntawd, thaum peb mus teev Ntuj, los yog nyeem Ntawv Ntshiab; peb ua siab fab, peb ntxhov siab txog ntau yam, peb tsis tsa peb lub siab nyob ze Tswv Ntuj mas peb yuav tsis to taub tias Huab Tais Tswv Ntuj tab tom hais dab tsi rau peb.
Txhua hnub peb yuav muab peb kev ntxhov siab tso pov tseg, ces peb muab siab npuab Huab Tais Tswv Ntuj, mloog saib Huab Tais Tswv Ntuj xav hais dab tsi rau peb.
