ZAJ NYEEM HNUB TIM 22 LUB 6 HLIS 2024
HNUB NCO TXOG LEEJ NTSHIAB PAUS LIS NUS NYOB NOS LAS
COV LUS NYOB HAUV MAS TAIS NTAWV MOO ZOO (MT 6: 24-34)
Kwv tij Hmoob sawv daws, thaum nej hnov Huab Tais Yes Xus hais tias ‘nej txhob txhawj txog nej txoj sia tias yuav muab dab tsi los noj, txhob txhawj txog nej lub cev tias yuav muab dab tsi los hnav. Nej ntsia cov noog, lawv tsis tseb nplej, tsis hlais nplej, tsis sau qoob, Tswv Ntuj twb pub rau lawv noj’, mas tej zaum muaj nej qee tus yuav xav tias yog Huab Tais Yes Xus tab tom qhia kom peb txhob khwv khwv ua noj ua haus, ua cas los Tswv Ntuj yeej yuav pub rau peb noj peb haus kom tsis tshaib plab. Los yog nej xav tias Huab Tais Yes Xus tab tom qhia kom peb ua neeg tub nkeeg txhob liam fab ua noj ua haus, txhob quav ntsej txog peb lub neej thiab txoj sia.
Yog nej xav li no, mas nej tab tom yuam kev loj.
Cov kwv tij, Huab Tais Yes Xus tab tom qhib peb lub tswv yim kom to taub tias txhua tsav txhua yam Tswv Ntuj tsim los nyob hauv lub sim ceeb no, mas Tswv Ntuj saib xyuas, yog cia ib leeg tu ib leeg, ib leeg tsob hwb ib leeg, sawv daws yuav tau ua neeg nquag nyias ua nyias yam hauj lwm Tswv Ntuj pub rau nyias, ces sawv daws yuav muaj txaus noj txaus haus thiab txaus cia pub rau cov tsis muaj.
Dua ntawd, Huab Tais Yes Xus tau ntuas tias ‘qhov ua ntej tshaj plaws thiab tseem ceeb dua lwm yam, yog xub nrhiav Tswv Ntuj lub Ceeb Tsheej thiab nws txoj kev ncaj.’
Tswv Ntuj lub Ceeb Tsheej yuav tuaj cuag peb tau, mas kawg kom peb sib nyiam sib hlub, sib hwm txhob sib hiam.
Li ntawd mas kwv tij Hmoob sawv daws, peb ua neej nyob mas peb yuav tau saib txoj kev sib nyiam, kev sib hwm, kev sib pab thiab kev ncaj ua qhov tseem ceeb nyob hauv peb cov hauj lwm nrhiav noj yug peb lub neej mog.
