ZAJ NYEEM HNUB TIM 22 LUB 5 HLIS 2024
HNUB NCO TXOG LEEJ NTSHIAB LIS TAS
COV LUS NYOB HAUV MAS KOS NTAWV MOO ZOO (MK 9: 38-40)
Cov kwv tij Hmoob sawv daws, thaum Huab Tais Yes Xus tsa 12 tug thwj tim ua Hauv Paus Xa Lus, ces Huab Tais Yes Xus xa lawv mus tshaj txog Tswv Ntuj lub Ceeb Tsheej, Huab Tais Yes Xus muab hwj huam rau cov Hauv Paus Xa Lus ntiab tau dab thiab kho tau cov neeg mob. Lawv mus tshaj txog Tswv Ntuj lub Ceeb Tsheej thiab ntiab dab hauv tej zos. Cov Hauv Paus Xa Lus pom muaj tej tus neeg kuj muaj peev xwm ntiab dab tau zoo li lawv, tab sis cov ntawd tsis yog pab 12 uas Huab Tais Yes Xus tsa ua Hauv Paus Xa Lus, mas cov thwj tim thiaj xav txwv tsis pub lawv ntiab dab.
Zam muab cov lus no los nug Huab Tais Yes Xus saib thaum pom zoo li no, cov Hauv Paus Xa Lus yuav ua li cas?
Huab Tais Yes Xus teb tias txhob txwv lawv, cia lawv ua lawv mus. Huab Tais Yes Xus ntuas Zam tias “Leej twg tsis tiv peb, mas nws tuaj peb tog.”
Kwv tij Hmoob sawv daws, thaum ub mas peb lub Koom Txoos Kav Tos Liv saib tias cov ncaim ntawm lub Koom Txoos mus; yam li cov Os Thos Dos, cov Plos Tes Taas, mas lawv tau ua txhaum rau Tswv Ntuj, lawv yuav mus tsis tau pem Tswv Ntuj lub Ceeb Tsheej.
Tab sis tom qab no, lub Koom Txoos mam to taub Huab Tais Yes Xus cov lus tias Huab Tais Tswv Ntuj hlub peb txhua leej txhua tus, Huab Tais Yes Xus xav cawm tas ntiaj teb neeg, Huab Tais Yes Xus qhia kom sawv daws nyob sib haum xeeb, ib tug yuav tau hwm ib tug. Li ntawd, lub Koom Txoos thiaj tsis muab txim rau cov tau ncaim ntawd, lub Koom Txoos rov saib tias lawv tseem yog lub Koom Txoos cov kwv tij. Yog li mas peb lub Koom Txoos Kav Tos Liv thiaj tsis thuam lwm txoj kev teev hawm, tsis thuam cov kwv tij nyob lwm lub Koom Txoos. Qhov lub Koom Txoos Kav Tos Liv yuav ua, mas yog tuav tes nrog sawv daws txhim tsa Tswv Ntuj lub Ceeb Tsheej, coj tus neeg raug mob dim hauv dab phem tes.
Cov Hmoob sawv daws, niaj hnub no thaum peb pom ib tug neeg twg ua cov hauj lwm zoo pab cawm lwm tus, mas peb yuav tsis txhob thuam, tab sis peb yuav tau pab txhawb nws txoj hauj lwm ntawd.
